Қатарда давом этаётган футбол бўйича Жаҳон чемпионатининг 1/8 финал учрашувлари якунланди.

Кеча Португалия терма жамоаси Швейцарияни 6:1 ҳисобида мағлубиятга учратган бўлса, пенальтилар сериясида Марокаш Испания терма жамоасини шов-шувли тарзда мағлуб этди.  

Плей-офф ўйинларининг биринчи босқич натижаларига кўра, АҚШ, Австралия, Япония, Жанубий Корея, Сенегал, Польша, Испания ва Швейцария терма жамоаларининг мундиалдаги иштироки якунланди. Энди миллионлаб футбол ишқибозлари чорак финалда яна тўртта учрашув, ярим финал, финал ва 3-ўрин учун кечадиган шиддатли ўйинларни кузатади.  

Мундиалнинг чорак финалида мухлислар Аргентина – Нидерландия, Бразилия — Хорватия, Англия — Франция, Марокаш — Португалия қарама-қаршилигига гувоҳ бўлишади.  

Барча учун қизиқарли бўлган Хорватия – Бразилия ва Нидерландия – Аргентина “дуэл”лари 9 декабрь куни бўлиб ўтади.  

Испания тўсиғини кучли ирода ва матонат билан ёриб чиққан Марокаш яна бир кучли жамоа – Португалия билан 10 декабрь куни ҳисоб-китоб қилади. Кўрамиз, Африка қитъаси вакиллари Жаҳон чемпиоантидаги иштирокини давом эттира олармикан. Айнан шу куни Англия – Франция баҳси чемпиоант безагига айланади.  

Эслатиб ўтамиз, 2018 йил Россияда ўтган Жаҳон чемпионати финалида ҳозирда олтин медаллар сари одимлаётган Франция ва Хорватия жамоалари рўбарў келган эди.  

Т.Рўзиев,  

ЎзА