Бугун Берлинда бўлиб ўтган Ўзбекистон – Германия бизнес форумида иштирок этган Mittelstand президенти Маркус Йергер икки мамлакат ўртасидаги иқтисодий ҳамкорликнинг жорий ҳолати хусусида тўхталди.

– Ўзбекистон Президенти Шавкат Мирзиёевнинг ташрифи Германия иқтисодиёти, айниқса, кичик ва ўрта бизнес тадбиркорлиги учун жуда муҳим, деб ҳисоблайман. Мамлакат ҳукумати вакиллари ва Германия компаниялари ўртасидаги алмашинувни ривожлантириш зарур.

Ўзбекистонда бизнес истиқболларини ўрганишга арзигули ислоҳотлар мавжуд, шу боис яқин келажакда тадбиркорлар билан Ўзбекистонга ташриф буюришни режалаштиряпмиз.

Принципиал жиҳатдан олиб қараганда, мамлакатингиз билан барча соҳаларда ҳамкорлик қилишдан манфаатдормиз. Германия компаниялари хомашё харид қилиш учун янги бозорга, айниқса, кичик ва ўрта корхоналар янги ҳудудда савдони йўлга қўйиш, шунингдек, ўз маҳсулотини сотиш учун янги бозорга муҳтож.

Уюшмамиз пахтачилик, тўқимачилик, ғайритабиий хомашёни қайта ишлашдан бошлаб кўплаб тармоқлар жадал ривожланаётган Ўзбекистонга турли соҳалардаги бир нечта компанияларни делегация сафарига ўзи билан олиб бормоқчи.

Ўйлайманки, ҳозирда Президент томонидан олиб борилаётган иқтисодий сиёсат Ўзбекистон бозорини очиш, айниқса, Европа ёки Германия компанияларининг мамлакатга кириши учун муҳим восита бўлиб хизмат қилмоқда. Шу боис ислоҳотлар дастури мамлакатингиз учун жуда муҳим. Биз немис ва ўзбек компаниялари ўртасида бозор очиш, икки мамлакат ишбилармонлари янада фаол ҳамкорлик қилиш тарафдоримиз.

Беҳруз Худойбердиев тайёрлади.

ЎзА