Пойтахтимизда “Марказий ва Жанубий Осиё: минтақавий боғлиқлик. Таҳдидлар ва имкониятлар” мавзусидаги халқаро конференция бўлиб ўтди.

Ушбу конференцияда Тожикистон Республикаси ташқи ишлар вазири Сирожиддин Муҳриддин Ўзбекистон Республикаси Президенти Шавкат Мирзиёев илгари сураётган ташаббусларнинг аҳамиятига тўхталди:

– Ўзбекистон Президенти яқинда расмий ташриф билан Тожикистонда бўлди. Бугун Шавкат Мирзиёев билан учрашувда ушбу ташриф чоғи эришилган келишувлар ижросини атрофлича муҳокама қилдик.  

Бугунги конференция тарихий воқеа бўлди. Ўзбекистон Президенти мазкур конференцияни ўтказиш ташаббуси орқали бутун дунёга минтақамиз салоҳиятини намойиш этди. Бунинг учун у кишига миннатдорлик билдирамиз.  

Ҳозирги мураккаб шароитда бундай нуфузли тадбирларни ўтказиш осон эмас. Анжуманда қардош мамлакатлар ҳамда халқаро ва минтақавий ташкилотлар вакиллари минтақамизнинг долзарб масалаларини, жумладан, Жанубий Осиё давлатлари билан иқтисодий ҳамкорлик, транспорт-транзит алоқалари, маданий-гуманитар ҳамкорлик йўналишларини муҳокама қилдик. Биз ишонамизки, бу ташаббус Марказий Осиёнинг бешта давлати, шунингдек, Жанубий Осиё минтақасига ҳамкорлик учун янги имкониятларни очади.

ЎзА