Ijtimoiy tarmoqlarda banklar tomonidan iste’molchilarning huquq va qonuniy manfaatlari buzilishiga doir fuqarolarning murojaatlari bo‘yicha e’lon qilinayotgan xabarlar yuzasidan Markaziy bank quyidagilarni ma’lum qiladi.

«Jismoniy va yuridik shaxslarning murojaatlari to‘g‘risida»gi qonunning 28-moddasiga ko‘ra ariza yoki shikoyat masalani mazmunan hal etishi shart bo‘lgan davlat organiga, tashkilotga yoki ularning mansabdor shaxsiga kelib tushgan kundan e’tiboran o‘n besh kun ichida, qo‘shimcha o‘rganish va (yoki) tekshirish, qo‘shimcha hujjatlarni so‘rab olish talab etilganda esa, bir oygacha bo‘lgan muddatda ko‘rib chiqiladi. 

Shuningdek, mazkur qonunning 6-moddasiga asosan jismoniy shaxsning murojaatida uning familiyasi (ismi, otasining ismi), uning yashash joyi to‘g‘risidagi ma’lumotlar ko‘rsatilgan bo‘lishi kerak hamda murojaat etuvchilarning vakillari orqali berilgan murojaatlarga ularning vakolatlarini tasdiqlovchi hujjatlar ilova qilinadi. 

Ta’kidlash lozimki, fuqarolar murojaatlarini sifatli va to‘liq o‘rganib chiqishda murojaatda keltirilgan vajlar batafsil tahlil etiladi hamda murojaat qiluvchi va faoliyati bo‘yicha murojaat tushgan kredit tashkilotining fikr va mulohazalari eshitiladi. Shunga ko‘ra, murojaatlarni o‘rganib chiqish va uni hal etish ayrim vaqtlarda zaruriy muddat talab etishi mumkin. 

Bunda bank xizmatlari ko‘rsatilishi borasidagi murojaatlarni o‘rganish natijalari bo‘yicha ma’lumotlar, agar unda bank siriga yoki shaxsga doir ma’lumotlar mavjud bo‘lsa, O‘zbekiston Respublikasining «Bank siri to‘g‘risida»gi va «Shaxsga doir ma’lumotlar to‘g‘risida»gi qonunlariga muvofiq uchinchi shaxslarga oshkor etmagan holda murojaatchining shaxsan o‘ziga yetkaziladi. 

Shu bilan birga, Markaziy bank tomonidan ijtimoiy tarmoqlardagi bank xizmatlari iste’molchilarining huquq va qonuniy manfaatlari buzilishiga oid xabarlar muntazam ravishda monitoring qilinib, ularda ko‘tarilayotgan masalalarni hal etilishi bo‘yicha zaruriy choralar ko‘rib borilmoqda. 

Xususan, joriy yilning iyul-sentyabr oylarida karta hisobvarag‘idan pul mablag‘i yechilgan bo‘lsa-da, bankomat naqd pul bermaganligi, nafaqa pulini bank kartasi orqali olish bo‘yicha muammoga duch kelinayotganligi, mobil ilova orqali o‘tkazilgan pul mablag‘i oluvchilarning karta hisob raqamiga tushmaganligi, kredit to‘lovlari to‘liq to‘langan bo‘lsa-da, karta hisobvarag‘idan kredit uchun to‘lov yechilganligi, bank xodimlari tomonidan fuqaro uchun notanish bo‘lgan kredit bo‘yicha kafil ekanligi to‘g‘risida qo‘ng‘iroqlar bo‘layotganligi, bankning mobil ilovasi orqali konvertatsiya qilingan hamda boshqa kartaga o‘tkazilgan mablag‘ ko‘rinmayotganligi, kreditni muddatidan oldin so‘ndirgani uchun keshbek taqdim etilmayotganligi kabi holatlar yuzasidan ijtimoiy tarmoqlarda xabarlar joylashtirilgan. 

Mazkur holatlardan kelib chiqib, Anorbank, Davrbank, Universalbank, Hamkorbank, Tenge bank, Xalq banki, Ipak yo‘li banki, Infinbank, Turonbank, Qishloq qurilish bank, Milliy bank, Kapitalbank, Sanoatqurilishbank, Aloqabank, Aziya Alyans banklariga xabarlardagi bank faoliyati bilan bog‘liq masalalarni o‘rganib chiqish va zaruriy choralarni ko‘rish yuzasidan 31 ta ko‘rsatma xatlar yuborildi. 

Ushbu ko‘rsatmalarga asosan tijorat banklari tomonidan xabarlar o‘rganib chiqildi va aniqlangan kamchiliklar bartaraf etilib, bu haqida o‘rnatilgan tartibda iste’molchilarga xabar berildi, shuningdek, ayrim banklar tomonidan bu to‘g‘risida ijtimoiy tarmoqlardagi rasmiy sahifalari va saytlari orqali iste’molchilarga tegishli tushuntirishlar berildi. 

Markaziy bank tomonidan ijtimoiy tarmoqlarda e’lon qilingan bank xizmatlari iste’molchilarining huquq va qonuniy manfaatlari buzilishi bilan bog‘liq bo‘lgan holatlar yuzasidan qonunda belgilangan muddatlarda tegishli choralarni ko‘rish davom ettiriladi.

Sh.Mamaturopova, 
O‘zA