Маргарита Мисюрина Осиёда иккинчи бўлди
Ҳиндистон пойтахти Нью-Деҳлида велоспортнинг трек йўналиши бўйича катталар ва ёшлар ўртасида Осиё чемпионати ўтказилмоқда.
Бугун чемпионатнинг учинчи кунги беллашувлари бўлиб ўтди.
Унда ҳамюртимиз Маргарита Мисюрина гуруҳ пойгасида маррага иккинчи бўлиб етиб келди ва кумуш медални қўлга киритди. Шунингдек, ёш спортчимиз Алимардон Жамолиддинов гуруҳ пойгасида бронза медалини ўзиники қилди.
Эслатиб ўтамиз, Жамолиддинов кеча ёшлар ўртасида ўтказилган омниум пойгасида кумуш медални қўлга киритган эди.
Маълумот учун, Ўзбекистон терма жамоаси чемпионатда ҳозирга қадар 3 та кумуш ва 2 та бронза, жами 5 медаль жамғарди.
Жавоҳир Тошхўжаев, ЎзА