Божхона органлари ходимлари тадбиркорлик субъектларининг муаммоларини ўрганиш ва уларга ҳар томонлама амалий ёрдам кўрсатиш мақсадида сайёр учрашувлар ўтказмоқда.

Навбатдаги учрашув Бухоро вилояти Олот туманидаги “Мергантекс” масъулияти чекланган жамиятида бўлди. Божхона ходимлари корхонанинг янги биноси ва 12 миллиард сўмдан ортиқ божхона имтиёзлари қўлланилган ҳолда олиб келинган ишлаб чиқариш техникалари билан танишди.

Мазкур корхона ўз фаолиятини 2005 йилда ўн нафар ишчи ўрни яратиш билан бошлаган бўлса, бугунга келиб  мингдан ортиқ ишчи ўрнига эга. Айни дамда корхонага 25 миллион долларлик инвестиция жалб этилган. 2023 йилнинг май ойига қадар экспорт салмоғини 20 миллион доллардан ошириш мақсад қилинган.

Вилоят божхона бошқармаси ходимларининг навбатдаги учрашуви Қоракўл туманидаги экспорт ва импорт фаолияти билан шуғулланувчи “Кумуш калава текстил” МЧЖ мутасаддилари билан бўлди. 

Корхона асосан, ип-калава ишлаб чиқаришга ихтисослашган. Корхона жорий йилнинг ўтган даврида 5.1 миллион АҚШ доллари қийматидаги маҳсулотлар экспортини амалга оширган.

Учрашув якунида божхона ходимлари корхона раҳбарларини соҳада тадбиркорликни ривожлантиришга қаратилаётган янгиликлар билан таништирди.

Зариф Комилов, ЎзА