«Давлат харидлари тўғрисида»ги қонунга кўра, давлат хариди амалга оширилишида рақобат ва холислик принципи бузилмаслиги, манфаатлар тўқнашувига йўл қўйилмаслиги шарт.

Бундан ташқари, қонундаги давлат буюртмачилари, харид қилиш тартиб-таомиллари иштирокчиси, иштирокчини харид қилиш тартиб-таомилларида иштирок этишдан четлатиш шартлари ва давлат харидлари жараёнидаги чекловлар билан боғлиқ талабларга риоя этилиши керак.  

Қонуннинг ушбу талабларидан келиб чиқиб Коррупцияга қарши курашиш агентлиги томонидан ўрганиш ўтказилди.  

Натижада Урганч шаҳар Ихтисослаштирилган санъат мактаб-интернати буюртмачилигида иссиқ овқат билан таъминлаш бўйича аутсорсинг хизмати учун 2023 йил 29 март куни ўтказилган 731,6 миллион сўмлик давлат харидида бир қатор қонунбузилишларга йўл қўйилгани аниқланди  

Жумладан, давлат харидида иштирок этган иккита масъулияти чекланган жамиятнинг раҳбари ва таъсисчиси бир киши эканлиги яққол кўриниб турган бўлсада, мавжуд аффилланганлик ҳолатларига баҳо берилмаган. Ноҳалол рақобатни келтириб чиқарганлиги ўрганилмаган ҳамда ҳолат бўйича танловни ўтказишни вақтинчалик бекор қилиш чоралари кўрилмаган.  

Шунингдек, харид комиссияси раиси, аъзолари (овоз бериб баҳолаш ваколатига эга) ва комиссия котиби томонидан ўртача 5 минут вақт ичида IP-манзили бир шахсга тегишли бўлган компьютер орқали харид натижалари баҳоланган. Баённома расмийлаштирилган ҳамда иштирок этган ва ғолиб деб топилган тадбиркорларнинг ҳужжатлари, маълумотлари қонунга зид равишда буюртмачи фойдаланган компьютер орқали электрон платформага юкланган.  

Мазкур ҳолатлар бўйича харид комиссиясининг баённомасини бекор қилиш тўғрисида Агентлик томонидан буюртмачига тақдимнома киритилди.  

Коррупцияга қарши курашиш агентлиги ахборот хизматидан маълум қилишларича, Урганч шаҳар Ихтисослаштирилган санъат мактаб-интернати томонидан Агентликка тақдим этилган хатга кўра, тақдимномада қайд этилган камчиликлар бартараф этилиб, харид комиссиясининг баённомаси бекор қилинган.  

Н.Абдураимова, ЎзА