Англия Премьер-лигасының (АПЛ) басшылығы «Манчестер Сити» футбол клубына бірнеше мәрте матч басталуын кешіктіргені үшін айыппұл салды.

Ереже бұзу фактілері 2024/25 маусымындағы АПЛ аясында клубтың 9 ойынында тіркелген. Тараптар өзара келісімге келген, клуб матчты бастау және қайта жалғастыру бойынша міндеттемелерге қатысты ережелердің бұзылғанын мойындаған.

The Sun басылымының мәліметінше, «қалалықтар» жалпы сомасы 800 мың фунт стерлингке (шамамен 1,08 миллион доллар) айыппұл төлейтін болды. Әрбір жаңа ережебұзушылық үшін айыппұл мөлшері өскен: мысалы, бірінші бұзушылық үшін – 40 мың фунт, ал тоғызыншысы үшін – 190 мың фунт.

Еске салар болсақ, 2024/25 маусымы қорытындысы бойынша «Манчестер Сити» Англия чемпионатының турнирлік кестесінде үшінші орынды иеленді.