O‘zbekiston Respublikasi Prezidentining 2021 yil 26 martdagi “Ma’naviy-ma’rifiy ishlar tizimini tubdan takomillashtirish chora-tadbirlari to‘g‘risida”gi qarorga muvofiq, Buxoro viloyatining barcha shahar va tumanlarida “Ma’naviyat va ma’rifat maskanlari”ni barpo etish bo‘yicha amaliy ishlar davom etmoqda.

Shu nuqtai nazardan, Buxoro shahrida barcha shart-sharoitga ega Ma’naviyat va ma’rifat maskani ishga tushirildi. Hududda ma’naviy-ma’rifiy ishlar samarasi va ta’sirchanligini oshirish, ko‘lami va miqyosini yanada kengaytirish, viloyat aholisi, avvalo, yoshlar kamoloti yo‘lida amalga oshirilayotgan islohotlarga daxldorlik hissini kuchaytirish, sohadagi ishlarni yangi bosqichga ko‘tarish maqsadida  qayta ta’mirdan chiqarilib, jihozlangan mazkur markaz ochilishida respublika Ma’naviyat va ma’rifat markazi viloyat bo‘limi hamda shahar-tumanlar bo‘linmalari rahbarlari, shahar ta’lim muassasalari targ‘ibotchilari, jamoatchilik vakillari ishtirok etdi.

Tadbirda ta’kidlanganidek, yuksak intellektual salohiyat, mustaqil dunyoqarashiga ega, tashabbuskor, jismonan sog‘lom va ma’nan yetuk bo‘lgan haqiqiy vatanparvarlargina bugun mamlakatimizda kechayotgan islohotlarning hal qiluvchi kuchi, xalqimizning haqiqiy ma’nodagi himoyachisi hisoblanadi. Buxoro shahrida “Ma’naviyat va ma’rifat maskani” ochilishi hududda ma’naviyatning o‘rni va nufuzini oshirishga xizmat qiladi, albatta. 

Tadbirda Buxoro shahridagi maktabgacha ta’lim tashkilotlari, “Barkamol avlod” bolalar maktabi ijodkor yoshlari tomonidan tayyorlangan qo‘l mehnati namunalari, ijodiy ishlar ko‘rgazmasi ham tashkil etildi.

Zarif Komilov, O‘zA muxbiri.