Мамлакатимизда барча соҳада амалга оширилаётган кенг кўламли ислоҳотлар ўз самарасини бериб, юксак натижаларга эришилмоқда. Бунда “Ўзбекистон – 2030” стратегияси мамлакатни ривожлантиришнинг устувор йўналишларини белгилаб бергани алоҳида аҳамият касб этади.

Мазкур стратегия доирасида олиб борилган амалий саъй-ҳаракатлар қисқа муддат ичида сезиларли ижобий натижаларни намоён этди. Биргина камбағаллик даражасининг 11 фоиздан 5,8 фоизга тушгани, ялпи ички маҳсулот ҳажмининг 145 миллиард долларга етгани ва бошқа кўплаб факт ва рақамлар стратегиянинг қанчалик ҳаётийлиги ва натижадорлигини кўрсатади.

Маълумки, давлатимиз раҳбари Шавкат Мирзиёев Олий Мажлис ва Ўзбекистон халқига Мурожаатномасида “Ўзбекистон – 2030” стратегиясини янада такомиллаштириш бўйича таклифни илгари сурди. Шундан келиб чиқиб, бугунги кунда ушбу ҳаётий стратегияни янада мукаммал ва пухта ҳолатда бойитиш, даврнинг ўзи тақозо қилаётган муҳим мақсад-вазифаларни акс эттириш мақсадида унинг янгиланган, такомиллаштирилган лойиҳаси ишлаб чиқилди. Энг муҳими, стратегияни халқимиз билан биргаликда такомиллаштириш мақсадида кенг жамоатчилик муҳокамаси учун тақдим этилди.  

— Президентимиз ўз Мурожаатномасида “Ўзбекистон – 2030” стратегиясини замон талабларига мувофиқ қайта кўриб чиқиш муҳимлигини алоҳида таъкидлагани тасодифий эмас, албатта. — дейди Олий Мажлис Қонунчилик палатаси депутати Дилмурод Артиков. — Бунга бир қатор объектив омиллар сабаб бўлмоқда. Биргина мисол, бир неча йил олдин 2030 йилгача ялпи ички маҳсулот ҳажмини 160 миллиард долларга етказиш стратегик мақсад сифатида белгиланган эди. Бугун эса ушбу маррага 2026 йилнинг ўзида эришилиши кутилаётгани мамлакат тараққиётининг суръати қанчалик тез эканини яққол намоён этмоқда. Бу ҳолат стратегия доимий равишда қайта таҳлил қилиниши, реал вазият ва янги имкониятларга мослаштирилиши зарурлигини кўрсатади.

Таъкидлаш лозимки, аниқ ва очиқ-ойдин белгилаб олинган стратегия давлатнинг фақат жорий муаммоларини ҳал этишга эмас, балки узоқ истиқболни кўзлаб иш юритишига далолат қилади. Фуқаролар давлат сиёсатининг мақсадларини, устувор йўналишларини, кутилган натижаларини англаб етган сари, қарорлар қабул қилиш жараёнида изчиллик ва мантиқийликни ҳис қилади. Бу эса жамиятда давлат сиёсатига нисбатан ишонч ва қўллаб-қувватлашни кучайтиради.

Албатта, “Ўзбекистон – 2030” стратегиясини муҳокама қилиш жараёнида халқ вакилларининг фаол иштироки алоҳида аҳамият касб этади. Чунки бу ҳужжат — мамлакатимизнинг келажак йўлини белгилаб берувчи муҳим дастурдир, — дейди депутат.

Дарҳақиқат, мамлакатимиз келажагини, эртанги равнақини белгилаб берадиган мазкур стратегик ҳужжат барча соҳаларда янгидан-янги марраларни забт этишга замин бўлади. Шундай экан, унинг лойиҳасини такомиллаштиришда шу юрт тақдирига дахлдор бўлган барча фуқаро фаол иштирок этиши, ўз таклифлари билан келажагимиз равнақига ҳисса қўшмоғи лозим бўлади.  

Муҳтарама Комилова,  

ЎзА