Пойтахтимизда Ўзбекистон Республикаси Ипакчилик ва жун саноатини ривожлантириш қўмитаси раиси Баҳром Шарипов ва Москва шаҳар Думаси Парламентлараро бюросининг маданий ҳамда ташқи иқтисодий ҳамкорлик бўйича раҳбари Марина Шматова ўртасида ипакчилик соҳасидаги ўзаро ҳамкорлик алоқалари масалалари бўйича учрашув бўлиб ўтди.

“Ўзбекипаксаноат” уюшмаси ахборот хизматининг маълумотига кўра, меҳмонга мамлакатимизда пиллачилик соҳасида олиб борилаётган ислоҳотлар кўлами ҳамда юртимиз бўйлаб давом эттирилаётган учинчи ва тўртинчи пилла етиштириш жараёнлари таништирилди. Марина Шматова келгусида пиллачилик соҳасига инвестиция киритиш юзасидан ўз қизиқишини билдириб ўтди.  

 Мулоқотдан сўнг, Ўзбекистондан Россия Федерациясига хом ипак, ипак момиғи ва ипак маҳсулотларини буюртма қилиш мақсадида ташриф буюрган россиялик вакил Сурхондарё вилояти Термиз шаҳридаги "Surxon ipagi” МЧЖ ва “Inter silk pro” қўшма корхонаси ҳамда Ангор туманидаги "Huashen Silkworm Pro” пилла қурти уруғини етиштириш корхонаси фаолияти билан яқиндан танишди.  

 Бугунги кунда пиллачилик соҳасида 0 дан 100гача занжирсимон тизим йўлга қўйилганлигига гувоҳ бўлганини алоҳида эътироф этди. Бу тизим орқали энг биринчи навбатда доимий равишда аҳоли бандлиги таъминланаётгани, хусусан, доимий ишчилари 50 дан ошиқни ташкил қилса, шартнома асосида олти юздан ортиқ  уйда ўтирган қишлоқ аёллари ипак қурти боқиш билан шуғулланиб келади.  

Шунингдек, Марина Шматова Қумқўрғон туманидаги "Silk town" МЧЖ пиллани қайта ишлаш корхонасида, Денов туманида ташкил этилган "Sino silk" ҳамда Жарқўрғон туманидаги "Silk village" пиллани қайта ишлаш корхоналар ва қурилаётган янги инвест лойиҳалар билан ҳам қизиқди.  

 Маълумки, Ўзбекистон туризм соҳаси салоҳиятининг ортишида ҳам йирик ипакчилик корхоналарининг улуши юқори. Хусусан, "Surxon ipagi" MЧЖ томонидан ташкил этилган "Termiz Palace" меҳмонхонаси ҳудуддаги юқори даражадаги хизмат кўрсатиш масканларидан саналади. Марина Шматова Сурхон диёрининг туристик имкониятлари билан танишиб, "Ўзбекипаксаноат" уюшмаси билан айнан бу борада ҳам ҳамкорликни ривожлантириш айни муддао бўлишини таъкидлади.  

 Ипак саноати соҳасига тегишли туризм йўналишига ҳам инвесторларни жалб қилишга келишиб олинди.  

Гулноза Бобоева, ЎзА