Пойтахтимизда енгил атлетика бўйича катталар ўртасида ўтказилаётган ёпиқ иншоотлардаги Ўзбекистон чемпионати кескин ва муросасиз баҳсларга бой ўтмоқда.

Мусобақанинг илк кунида ядро улоқтириш баҳсларида Малика Насриддинова 16.33 натижа билан қизлар ўртасида биринчи ўринни эгаллаган бўлса, ушбу йўналишнинг ўғил болалар ўртасидаги баҳсларида Рашидбек Содиқов 16.01 натижа қайд этиб, олтин медалга сазовор бўлди.  

Таъкидлаш лозимки, Малика Насриддинова ёпиқ иншоотларда ядро улоқтириш бўйича ўсмирлар ўртасида 16,33 натижа кўрсатиб, Ўзбекистон рекордини ўрнатди. У бу натижа орқали 39 йил олдин Моника Aндрис томонидан ўрнатилган рекордни янгилади. Моника 1984 йил 11 февралда Ленинград шаҳрида Бутуниттифоқ мусобақаларида 15,67 натижани кўрсатган эди.  

Шунингдек, Малика 2006 йил 3 июнда Бишкекда Оксана Котга тегишли бўлган очиқ майдондаги ўсмирлар ўртасидаги мутлақ рекордни ҳам янгилади. Ўшанда Оксана 16,24 натижа қайд этган эди.  

Жавоҳир ТОШХЎЖАЕВ,  

ЎзА мухбири