Франция президенти Эммануэль Макроннинг Мали ҳақидаги “нодўстона фикри” туфайли француз элчиси Мали ташқи ишлар вазирлигига чақиртирилди.

Африка республикасининг ташқи ишлар маҳкамасидан Twitter орқали маълум қилинишича, Мали ташқи ишлар вазири Абдулай Диоп элчига ҳукуматнинг қоралов хулосаси ва норозилик номасини топширган.

Бамако Макроннинг бундай баёноти икки давлатнинг дўстона муносабатига путур етказади, деб ҳисоблайди.

Вазир Парижни вазминликка ва Сахел минтақасидаги ҳамкорлик билан террорчиликка қарши курашга чақирган.

Эслатиб ўтамиз, 5 октябрда Эммануэль Макрон француз ҳарбий миссияси шарофати билангина террорчилар Малини эгаллаб олмаганини айтганди.

З.Мирзабоева, ЎзА