Малайзияның Пенанг штатында «Өзбекстан – Ұлы Жібек жолының жауһары» атты Өзбекстан-Малайзия туристік форумы өтті.

Форум аясында Өзбекстанның туристік әлеуеті, тарихи орындары, мәдени және табиғи байлықтары таныстырылды. Шара барысында Шахрисабз, Самарқанд, Бұхара, Хива және басқа да қалалардың тарихи әрі мәдени маңыздылығына ерекше назар аударылды.

Өзбекстан Туризм комитеті баспасөз қызметінің хабарлауынша, екі елдің 100-ден астам туризм саласындағы өкілдерінің қатысуымен өткен B2B кездесулерінде екіжақты іскерлік байланыстар орнатылып, туристер ағынын арттыру бойынша келісімдер жасалды.

Сонымен қатар, Малайзия туристік компанияларының өкілдері форум аясында ұйымдастырылған «Жаңа Өзбекстан» фотокөрмесі арқылы соңғы жылдары Өзбекстанда салынған жаңа туристік нысандар, жаңартылған инфрақұрылым мен мәдени мұра объектілерімен танысты.

Форум қонақтары өзбек халқының бай мәдениеті мен дәстүрлерін көрсететін ұлттық әндер мен билерді тамашалап, дәстүрлі өзбек тағамдарынан дәм татты.

Аталған форум Өзбекстан мен Малайзия арасындағы туристік байланыстарды нығайтуға, өзара тиімді серіктестік үшін жаңа мүмкіндіктер ашуға маңызды қадам болды.