O‘zbekistonning Malayziyadagi elchisi Karomiddin Gadoyev Mutiara Perlis Sdn Bhd kompaniyasi  direktorlar kengashining ijrochi raisi Shabaruddin Ibrohim bilan  uchrashuv o‘tkazdi.

Unda tomonlar O‘zbekistonni Janubi-Sharqiy Osiyo bilan bog‘lovchi  transport yo‘laklarini takomillashtirish istiqbollari hamda yangi yo‘nalishlarni  ochish imkoniyatlarini muhokama qildi. Xususan, mintaqada  tashqi savdo  aylanmasini oshirishga sezilarli darajada  hissa qo‘shadigan  «Qoshg‘ar – Torugart – Makmal – Jalal-obod – Andijon» temir yo‘li va Transafg‘on avtomobil yo‘li loyihalarining muhim ahamiyati qayd etildi. 

Mamlakatimizning tranzit salohiyati va  Malayziya kompaniyasining qurilish sohasidagi ko‘p yillik tajribasini inobatga olib, Andijon viloyatida quruqlik portlarini  qurish loyihalarini amalga  oshirish istiqbollariga e’tibor qaratildi. Malayziya kompaniyasi vakili O‘zbekistonda bunday loyihaga qiziqish bildirib, hamkorlik  imkoniyatlarini ko‘rib chiqishga  tayyorligini bildirdi. 

Mutiara Perlis Sdn Bhd kompaniyasi 2018  yilda davlat xususiy sheriklik  asosida tashkil etilgan bo‘lib,  Malayziya, jumladan Perlis shtatida  yirik  logistika va energetika loyihalarini  amalga oshiradi. 

Aziza Alimova tayyorladi, O‘zA