Мактабгача ва мактаб таълими вазирлиги томонидан Ўзбекистон футбол ассоциацияси билан ҳамкорликда жисмоний тарбия фани ўқитувчилари учун семинар-тренинглар ташкил этилди.

Тадбирнинг очилиш маросимида Мактабгача ва мактаб таълими вазири ўринбосари Дилшод Кенжаев, ЎФА биринчи вице-президенти Равшан Эрматов, ФИФА вакиллари Алехандра Ҳуэте ҳамда Алберто Гиаcоми иштирок этди.    

ФИФА вакиллари томонидан «Football for schools» – “мактабларда футбол" лойиҳаси ҳақида тақдимот қилинди.    

Таъкидланишича, "Football for schools" лойиҳаси бугунги кунда 53 та мамлакатда жорий қилинган бўлиб, дастур мазкур спорт турига қизиқадиган иқтидорли ёшларни саралаб олиш ҳамда ўқитишда алоҳида аҳамиятга эга.  

Айнан "Football for schools"  лойиҳаси ёрдамида дунё бўйлаб таниқли спорт юлдузлари етишиб чиққан. Бу Ўзбекистондаги истеъдодли ёшларни кашф этишда ҳам ўзига хос роль ўйнаши шубҳасиз.  

Тренингларда бутун республикадан саралаб олинган 28 нафар жисмоний тарбия ўқитувчиси иштирок этмоқда.  

Семинар иштирокчилари учун амалий машғулотлар ҳамда “Чиғатой” спорт базасига ташриф режалаштирилган.  

Семинар-тренинглар 29 апрелгача давом этади.  

Н.Усмонова, ЎзА