Давлатимиз раҳбари жорий йил 5 февраль куни ўтказган ижтимоий соҳадаги устувор вазифаларга бағишланган йиғилишда мактаблардаги инспектор-психологлар штати Ички ишлар вазирлигидан Миллий гвардия тизимига ўтказилди.
Инспектор-психологларнинг асосий вазифаси ўқувчиларнинг таълим-тарбиясини ташкил этишда мактаб жамоаларига яқиндан кўмаклашиш, мунтазам дарс қолдирувчи ўқувчиларнинг ота-оналари билан ишлашдир. Ушбу вазифаларнинг самарали ижро этилишини таъминлаш мақсадида Миллий гвардиянинг республикамиз бўйича бошқармаларида инспектор-психологлар учун семинар машғулотлари ўтказилиб, уларга Миллий гвардияга қабул қилинганлиги бўйича хизмат гувоҳномалари топширилмоқда.
Ана шундай тадбирларнинг навбатдагиси Миллий гвардия Сурхондарё вилояти бўйича бошқармасида бўлиб ўтди. Унда 85 нафар инспектор-психологга Миллий гвардия хизмат гувоҳномалари топширилди.
Шуни алоҳида таъкидлашимиз керакки, эндиликда мактаб директорларининг маънавий-маърифий ишлар, чақириққа қадар ёшларни тайёрлаш бўйича ўринбосарлари, психолог ва синф раҳбарларининг ўқувчилар маънавиятини юксалтириш ва дарслардаги иштироки, таълим-тарбия ишларини ҳамоҳанг ташкил этишга доир масъулияти янада оширилади. Ота-оналар ва маҳалла фаоллари иштирокидаги “мактаб – ота-она – маҳалла” ҳамкорлиги узвий ташкил этилади.
Ўқувчиларнинг дарсда мунтазам иштирокини таъминлаш, уларнинг бўш вақтини мазмунли ўтказиши учун тўгарак ва машғулотларни кўпайтириш, ушбу жараёнларга ота-оналар ва ҳудуддаги фаол фуқароларни кенг жалб этиш бўйича манзилли ишлар олиб борилади.
Н.Раҳмонова, ЎзА мухбири