“Пахтакор” футбол мактабида камолга етиб, Киевнинг “Динамо”сида ажойиб ўйинлари билан мухлислар меҳрини қозонган Шацких Тошкентда ўз мураббийлик фаолиятни бошлайдиган бўлди.

Бу ҳақда Спортни ривожлантириш вазирлиги матбуот хизмати хабар берди. 

Футболчиликни якунлаб, Украина ва Россиянинг қатор футбол клубларида мураббийлик қилган Шацких жорий йил июнь ойида “Пахтакор”да спорт директори сифатида иш бошлаган эди. 

Куни кеча “Пахтакор” футбол клуби ва Максим Шацких ўртасида уч йиллик шартномага имзо чекилди. Унга пойтахт жамоасини бошқаришда жисмоний тайёргарлик мураббийи сифатида украиналик Виталий Шпанюк ёрдам беради. 

51 ёшли Шпанюк фаолияти давомида Украинанинг “Кремен”, “Арсенал”, “Славутич”, “Карпати”, “Львов”, “Ворскла” ва ЛНЗ, Россиянинг “Анжи”, “Ротор”, Грузиянинг “Динамо” клубларида, уч ярим йил Украина миллий терма жамоасида ишлаган. 

Бундан ташқари, Украинанинг “Таврия”, “Металлист”, Грузиянинг “Динамо” ва Россиянинг “Ротор” клубларида фаолият юритган Вячеслав Беляев Шацкихга ёрдамчи мураббий сифатида кўмаклашади. 

Шунингдек, маҳаллий мутахассислардан Денис Иванков, Камолиддин Тожиев ва Юрий Сиянов Шацких етакчилигидаги “Пахтакор” мураббийлари таркибидан жой олган. 

ЎзА