Франция Президенти Эммануэль Макрон олдига жиддий мақсадлар қўйиб, шарққа, Чин диёрига йўл олди. Айтишларича, уни икки муҳим масала қийнаяпти: Париж ва Пекин муносабатига салбий таъсир кўрсатаётган савдо камомади ва Хитой нима учун Москвани қўллаб-қувватлаётгани.

Фаранг етакчисига олти вазир ва 35 нафар йирик бизнес вакили ҳамроҳлик қиляпти. Хуллас, Макрон уч кун Хитойда бўлади, пайшанба куни Раис Си Цзиньпин билан учрашди. Елисей саройи мазкур ташриф ҳақида: “Биз Хитой Европани, жумладан Францияни етакчи ҳамкор сифатида ҳурмат қилишини истаймиз” дея хабар берди.

ЕИ Хитойнинг энг йирик савдо шериги саналади ва бу алоқалар 300 миллиард евро миқдорида Хитой фойдасига ишлайди. Макрон ушбу мувозанатсизликни тартибга солиш учун янги шартномалар тузишдан умидвор. Шунингдек, у Си Цзиньпин орқали Россияга таъсир қилиб Украина билан урушни тўхтатишга ҳисса қўшмоқчи. Ташқи ишлар вазири Жан-Ноэль Барро айтишича, “Хитой Владимир Путинни тўғри қарор қабул қилишга йўналтиришда ҳал қилувчи роль ўйнаши мумкин”.  

Гарчи Пекин доим тинчлик музокарасини ёқласа-да, Россия – Украина уруши борасида бетарафлигини таъкидлайди. Ғарб давлатлари эса Хитойни Россия мудофаа саноати учун эҳтиёт қисмлар етказиб беришда айблайди.  

Барибир, Макроннинг Шарқдан умиди катта...

<iframe width="560" height="315" src="https://www.youtube.com/embed/THKlsb3fvUY?si=6z2taAhJ4TQ4U7nF" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА