Франция президенти Эммануэль Макрон Россия президенти Владимир Путин билан музокара ўтказгандан кейин Москвадан Киевга етиб келди.

"Украина-24" телеканалининг маълум қилишича, Макрон Борисполь аэропортидан тўғри Украина президенти билан учрашиш учун Мариинск саройига йўл олган. Бу Франция етакчиларининг 1998 йилдан буён илк ташрифи бўлди. Макроннинг Киевга сафари чоғида унга Франция ташқи ишлар вазири Жан-Ив Ле Дриан ҳамроҳлик қилмоқда.

Бундан аввалроқ  Франция етакчиси бир неча бор Донбассдаги можарони тўхтатиш ва муаммоларни дипломатик йўл билан ҳал этиш кераклигини айтган эди. Макроннинг таъкидлашича, унинг учун инқироздан сиёсий йўл билан чиқиш йўлларини топиш устувор масала ҳисобланади.

У шунингдек, Киевга ташрифи чоғида Украина етакчисига Москвада бўлиб ўтган музокараларда кўтарилган масалалар  ҳақида сўзлаб беради. Украина президенти билан суҳбатлашгандан кейин Макрон яна Путин билан телефон орқали фикр алмашади.