Франция Президенті Эммануэль Макрон мен Палестина басшысы Махмуд Аббас Париждегі кездесуінен кейін палестиналықтар үшін жаңа Конституция жобасын әзірлейтін бірлескен комиссия құрылатынын жариялады.

— Палестина мемлекеттілігін нығайту мақсатында бірлескен комитет құруға келістік, — деді Франция басшысы. — Президент маған Конституция жобасын ұсынды, енді бұл құжатты жетілдіретін боламыз. Аббас бұл бастаманы жақын арада жүзеге асыруға келісімін берді.

Элисей сарайы кездесу алдында таратқан мәлімдемесінде былай деп атап өтті:
«Палестинада демократиялық әрі егемен мемлекет құруды қамтамасыз ету — Израильмен бейбіт әрі қауіпсіз өмір сүрудің маңызды қадамы».

Бұл кездесу Францияның Бельгия, Ұлыбритания, Португалия, Канада және Австралиямен бірге Палестина мемлекетін ресми түрде мойындағаннан кейін өтті.

Белгілі болғандай, Махмуд Аббас 20 жылдан бері Батыс жағалаудың кейбір аймақтарын басқарып келе жатқан Палестина әкімшілігінің жетекшісі болып табылады. Ол сондай-ақ Газа секторын да келісім негізінде басқару ықтималдығы туралы айтты.

Макрон өз сөзінде Израильдің Батыс жағалауды толық немесе жартылай аннексиялау жоспары Париж үшін «қызыл сызық» екенін атап өтті:

— Халықаралық құқыққа қайшы мұндай жоспарға Еуропадағы серіктестерімізбен бірге қатаң жауап шараларын қолданамыз, — деді ол.

Өз кезегінде Израиль елшілігі Париждегі кездесуді сынға алып, Махмуд Аббасты «Францияны өз мүддесіне пайдаланып отырған тұлға» деп атады және Палестина әкімшілігі Батыстың қаржылай көмегін террористерді қаржыландыру үшін пайдаланып отыр деген айып тақты.