Нафақа пулини тўлиқ миқдорда олиш ва аввалги ҳаёт кечириш даражасини сақлаб қолиш учун французлар кўпроқ ишлашга тўғри келади, деди Франция Президенти France 2 телеканалига берган интервьюсида.

Журналистнинг “юқори инфляция шароитида харид қобилияти пасайишидан хавотир олаётган французларга қандай маслаҳат берасиз”, деб берган саволига Франция етакчиси шундай жавоб берди:    

"Агар биз бирор нарсага эришмоқчи бўлсак, агар ривожланишни истасак, кўпроқ ишлашни бошлашдан ўзга танловимиз йўқ. Ким кўп ишлашни хоҳласа, биз уларни ортиқча ишлаган соатларига солиқ солишни бекор қиламиз. Биз ушбу сиёсатни давом эттирамиз ва кенгайтирамиз. Ким кўп ишлашни истаса, кўпроқ олиш имкониятига эга бўлади", – деди Макрон.  

"Шундай қилиш керакки, ёшларимиз ишга фаол равишда чиқсин. Агар Германия билан таққослайдиган бўлсак, ёшларимизнинг меҳнат бозорида иштирок этиш даражаси жуда паст. Шунингдек, Францияда ишсизлар даражаси бугунги кунда 7 фоизни ташкил этмоқда, Германияда эса ушбу кўрсаткич 3 фоиз. Биз кўпроқ ишлашимиз керак ва бунинг учун пенсия ислоҳотини амалга оширишимиз лозим", – деди Президент.  

Макроннинг таъкидлашича, экспертлар ҳисоб-китобига кўра, 2027 йилга келиб Францияда пенсияни молиялаштириш учун 10 дан 12 миллиард еврогача керак бўлар экан. Макрон таклиф қилаётган пенсия ислоҳоти нафақага чиқиш ёшини босқичма-босқич 62 дан 2031 йилга келиб 65 ёшгача узайтиришни кўзда тутади.