Франция президенти Эммануэль Макрон Бирлашган Миллатлар Ташкилоти Бош Ассамблеясининг 77-сессияси минбаридан туриб сўзлаган нутқида айни дамда сайёрамизда элликдан ортиқ фуқаролар уруши кечаётганини айтди.

“Ҳозир сайёрамизнинг турли минтақаларида 55 та фуқаролар уруши бор, 100 миллион одам ўз уйини тарк этган. 345 миллион киши очарчиликни бошидан кечирмоқда, улардан 153 миллиони болалардир”. Унинг таъкидлашича, “озиқ-овқат инқирози ҳамма жойда  кўзга ташланмоқда. “Сўнгги 40 йил ичида  қурғоқчиликни бошдан кечирган Африканинг кўплаб ҳудудлари иқлим хавфига дуч келмоқда. Сомали, Яман, Афғонистонда вазият кескинлигича қолмоқда. Сайёрамизга очарчилик  қайтиб келди”, деди у.

Макроннинг таъкидлашича,  “жаҳон ҳамжамиятининг умумий масъулияти энг заиф мамлакатларга  қийинчиликларни енгиб ўтиши учун  ёрдам беришдир”.

ЎзА