Халқ депутатлари Фарғона вилояти Кенгаши сессиясидан сўнг вилоят ҳокими вазифасини бажарувчи Хайрулло Бозоров иштирокида журналистлар учун матбуот анжумани ўтказилди.
Россиянинг ваколатли органлари томонидан аввал қуритилган мевалар, кейин эса барча қишлоқ хўжалиги маҳсулотларига тақиқ қўйилгани, бу вилоятга, умуман экспортга қай даражада таъсир қилиши ҳақидаги саволга ҳоким қуйидагича жавоб берди
– Жуда катта салбий таъсир ўтказади. Агар тақиқ олиб ташланмаса, Фарғона деҳқонларига оғир бўлади. Бизда жуда кўп янги боғлар барпо этилган, уларнинг ишлаб чиқариши асосан экспортга мўлжалланган. Тақиқ масаласи эса помидор билан бошланган эди ва ўша заҳоти долзарб мавзуга айланди. Ҳозир вилоятга пойтахтдан ҳам мутахассислар келган ва барча иссиқхоналарни текшириб бўлдик. Эътиборли томони, ўша Россияга юборилган помидордан чиққан касаллик бирорта иссиқхонада аниқлангани йўқ. Москвага синов тариқасида 5 килограмм помидор олиб борилган. Агар мижозга ёқса, кўпроқ олиб бориш мақсад қилишган. Ўша кичик партиядан касаллик топилган.
[gallery-421]
Биз барчасини аниқладик, помидор Марғилон бозоридан олиб борилган. Охири ўша помидорни сотган тадбиркорни ҳам қидириб, бозордан топдик ва қаерда етиштирилганини ҳам аниқладик. Қўшни вилоятдаги иссиқхонада етиштирилган экан. Биз у ерга ҳам бордик ва иссиқхонани текширувдан ўтказдик. Эътиборли томони, унда ҳам касаллик аниқланмади. Бу маълумотларни Россиядаги Карантин инспекциясига юбордик.
Энди қуритилган мевага келсак, ҳозир бу борада текшириш олиб борилаяпти, ўрганиляпти. Бу вақт талаб қилади. Ўрик сифатсиз юборилгани рост, тан оламиз. Маҳсулот бозорда сотиш учун эмас, балки компот қилиш учун юборилган. Ўрикка вақт ўтиб қурт тушади, бу табиий. Бу борада ҳозир ҳукумат даражасида иш олиб борилмоқда. Сешанба куни рухсат олиниши кутилмоқда.
Биз барча хулосани тайёрлаб, ҳар бир маҳсулот етиштирувчини текшириб, бизнинг Карантин инспекцияси тегишли сертификат бергандан кейин, хавфсиз эканига ишонч ҳосил қилиб, рўйхатини Россияга берадиган бўлдик. Улар ўша экспортёрларга рухсат беради. Ҳозирча шунга келишилган. Кейинчалик ҳамма бемалол экспорт қилиши мумкин бўлади.
Н.Насриев, ЎзА