Ўзбекистон Республикаси Президенти “Маҳаллий ишлаб чиқариш ва саноат кооперациясини янги тизим асосида ривожлантириш бўйича биринчи навбатдаги чора-тадбирлар тўғрисида”ги фармонни имзолади.
Ушбу фармонга кўра:
(а) саноат кооперацияси ва давлат харидлари соҳасида ягона бошқарувни жорий этиш орқали яхлит ва мувофиқлаштирилган давлат сиёсати юритилиши йўлга қўйилади;
б) мамлакатда юқори технологияли ва рақобатбардош маҳсулотлар ишлаб чиқаришга йўналтирилган қўшилган қиймат занжирлари яратилади, ўзлаштириш тавсия этиладиган рақобатбардош маҳсулотлар аниқланади;
в) тармоқ корхоналари томонидан бутловчи буюмлар, хомашё ва материаллар ишлаб чиқарилишини ўзлаштириш орқали иқтисодиёт тармоқларининг ташқи омилларга боғлиқлиги камайтирилади;
г) йирик корхоналарнинг ишлаб чиқариш занжирларига кичик ва ўрта бизнес субъектлари кенг жалб қилинади;
д) маҳаллий маҳсулотлар ишлаб чиқаришни кенгайтириш ҳисобига маҳсулот таннархи пасайтиришга эришилади;
ж) маҳаллий ишлаб чиқаришнинг глобал етказиб бериш занжирларига интеграциялашуви таъминланади;
з) ишлаб чиқариш қувватларини технологик янгилаш ва халқаро сифат стандартларини жорий этишга хизмат қилувчи инновацион ечимлар ўзлаштирилади;
и) иқтисодиёт тармоқларида маҳаллий маҳсулотлар ишлаб чиқаришни кенгайтириш ва саноат кооперацияси соҳасидаги малакали кадрларни тайёрлаш, қайта тайёрлаш ва уларнинг малакасини ошириш бўйича тизимли ишлар ташкил этилади.
Фармон билан:
а) Саноат кооперацияси ва давлат харидлари агентлиги;
б) Саноат кооперацияси ва давлат харидлари агентлиги бошқарув кенгаши ташкил этилади.
Иқтисодиёт ва молия вазирлигининг давлат харидлари соҳасидаги вазифалари, функциялари ва ваколатлари Саноат кооперацияси ва давлат харидлари агентлигига ўтказилади.
Фармонга мувофиқ:
а) Саноат кооперацияси ва давлат харидлари агентлиги фаолиятининг асосий йўналишлари;
б) Саноат кооперацияси ва давлат харидлари агентлиги тузилмасига ўтказиладиган ташкилотлар рўйхати;
в) Саноат кооперацияси ва давлат харидлари агентлиги бошқарув кенгашининг таркиби тасдиқланди.
ЎзА