Таъкидлаш лозим, “маҳалла еттилиги”га киритилган солиқ хизмати органи ходимларининг асосий вазифаси – ўзига бириктирилган ҳудуддаги ишчи-ходимларни легаллаштириш, ноқонуний тадбиркорлик фаолияти билан шуғулланаётган фуқаролар фаолиятини қонунийлаштиришга кўмаклашиши ва шу орқали солиқ базасини кенгайтиришдан иборат.
Шу мақсадда, Қоракўл тумани Тинчлик, Дўстлик ва Тайқир маҳаллаларига бириктирилган солиқ инспектори Бобурбек Ашуров ҳам ҳудудидаги солиқ тўловчилар билан ҳамкорликда “Солиқчи – кўмакчи” тамойили асосида фаолият юритиб келмоқда.
Жорий йил январь ойида “Маҳаллаларда солиқ органлари фаолияти” ахборот тизимида баҳолаш натижаларига кўра Бухоро вилоятининг самарадорлик кўрсаткичи 86,7 баллни ташкил этди. Шу қаторда Бобурбек Ашуровнинг ҳам январь ойидаги самарадорлик кўрсаткичи 100 баллда баҳоланган.
– Бириктирилган маҳаллада жорий йил бошидан 15 га яқин ишламай турган тадбиркорларнинг фаолияти тикланди, – дейди Бобурбек Ашуров. – Ҳудуддаги 100 га яқин фуқаролар ўзини ўзи банд қилган шахс сифатида рўйхатдан ўтди. Тадбиркорлик субъектлари билан солиқ қонунчилигини тўғри тушунтириш натижасида қўшимча ишчи ўринларини легаллаштиришга эришмоқда. Жумладан, трикотаж маҳсулотларини ишлаб чиқаришга мўлжалланган “Demodel” тикув корхонасида “Солиқчи – кўмакчи” тамойили асосида 30 дан зиёд ишчи ўринлар легаллаштиришга эришилди.
Таъкидлаш керакки, солиқ инспектори Бобурбек Ашуровнинг ҳудудидаги тадбиркорлик субъектлари билан ҳамкорликда ишлаши, уларни солиқ қонунчилигидаги янгиликларни доимий тарзда хабардор қилиб туриши натижасида фаолиятини кенгайтириб қўшимча иш ўринларини яратаётган субъектларнинг сафи ортмоқда. Нон ва нон маҳсулотларини ишлаб чиқаришга мўлжалланган “Dilkor Trans” корхонаси ҳам бугунги кунда фаолиятини кенгайтириб қўшимча иш ўринларини яратишга ҳаракат қилмоқда.
Бир сўз билан айтганда, бугунги кунда жойларда маҳалла солиқ инспекторлари тадбиркорлик фаолиятларини қўллаб-қувватлаш, аҳолини тадбиркорлик фаолиятига кенг жалб этиш, яширин тадбиркорлик фаолиятларини соядан олиб чиқиш ва бунинг ҳисобига солиқ базасини кенгайтиришда жонбозлик кўрсатмоқда.
Зариф Комилов, ЎзА мухбири