Бугун, 14 апрель куни Франциянинг Париж шаҳрида олти кундан бери дунё шахмат ишқибозлари эътибор марказида бўлган “Freestyle Chess Grand Slam Paris” турнири якунланади. Дунёнинг энг маҳоратли 12 нафар шахматчиси қатнашаётган турнирда кимлар қайси ўринларни эгаллаши тўлиқ аниқланади.

Кеча сўнгги тур ўйинларининг дастлабки баҳслари бўлиб ўтди. Ғолибликка асосий даъвогар норвегиялик Магнус Карлсен америкалик Хикару Накамуруни 1:0 ҳисобида доғда қолдирган бўлса, 3-ўрин учун кечган мусобақанинг 1-турида Фабиано Каруана германиялик Винсент Кеймерни енгди.

Ҳамюртимиз Нодирбек Абдусатторов кеча ФИДЕ байроғи остида ҳаракатланаётган россиялик Ян Непомняший билан 7-ўрин учун ўтказилган дастлабки турда рўбарў келди.

Саралаш мусобақаларидаги руҳий зўриқиш, босимлар остидаги ўйинлар бу сафар ҳам ўз таъсирини кўрсатди, назаримизда. Абдусатторов оқ доналарда рақибига 7-ўрин учун курашнинг дастлабки турида очко улашди. Албатта, бу ўйинда россиялик шахматчининг илк юришларданоқ ҳужумкор ўйин намойиш этгани ҳам самара берганини айтиш лозим.

Умидимиз, бугун ўтадиган ҳал қилувчи баҳсда Нодирбек Абдусатторов руҳий мувозанатини тиклаган ҳолда ғолиблик сари катта юришини амалга оширади.

Эслатиб ўтамиз, умумий мукофот жамғармаси 680 минг АҚШ долларидан иборат турнирда ғолибликка эришган шахматчи 200, 2-ўрин соҳиби 140, 3-ўрин 100, 4-ўрин 60, 5-ўрин 50, 6-ўрин 40, 7-ўрин 30, 8-ўрин 20, 9-ўрин 15, 10-ўрин 10, 11 ва 12-ўриндан жой олганлар 7500 АҚШ доллари билан тақдирланади.

Т.Рўзиев, ЎзА