Ўқишга киритиб қўйишни ваъда қиладиган фирибгарларнинг ноқонуний ҳаракатларидан аҳоли қанча огоҳлантирилмасин, билиб-билмай яна шу жирканч ишга қўл ураётганларнинг учраши кишини ўйга толдиради.

  Нима, халқимиз шунчалик соддами ёки айримлар ҳар қандай қонун, тартиб-қоидани четлаб ўта оламан, деб ўйлайдими? Ҳар қандай ҳолатда ҳам қонунга зид ҳаракат фош этилиб, айбдорлар бунинг учун қонун олдида жавоб беришига тўғри келади.

 Қашқадарё вилоятидан рўйхатдан ўтган “Kesh turon Centr-C” МЧЖ раҳбари С.С. билан ҳам шундай ҳолат юзага келди. У Жомбой туманида яшовчи У.Ш.ни Самарқанд ветеринария медицинаси институтининг магистратурасига ўқишга киритиб қўйиш учун 17 минг АҚШ доллари олаётган вақтида Самарқанд вилояти ДХХ ва ИИБ ходимлари томонидан ушланди.  

 Самарқанд шаҳридаги Ибн Сино номидаги жамоат саломатлиги техникуми девонхона инспектори С.О. эса Булунғур туманида яшовчи фуқарога мазкур ўқув муассасасига 800 АҚШ доллари эвазига ўқишга киритиб қўйишни ваъда қилади.  

 Нафси бузуқ инспектор фуқародан келишилган пулнинг 700 АҚШ долларини олаётган вақтида ДХХ Самарқанд вилояти бошқармаси ва иқтисодий жиноятларга қарши курашиш департаментининг ҳудудий бошқармаси ҳамкорлигида ўтказилган тезкор тадбир чоғида фош этилди.  

 Яна бир ҳолатда, Самарқанд давлат чет тиллар институти “Инглиз тили II” факультети деканининг ўқув ишлари бўйича ўринбосари И.С. мазкур институт 2-курс талабасининг оралиқ имтихонлардан ўтишида кўмаклашиш ва талабалар сафидан четлатмаслик эвазига 600 АҚШ долларини пора сифатида талаб қилган.  Декан ўринбосари талабадан келишилган пулнинг 550 АҚШ долларини хизмат хонасида олаётган вақтида жиноят устида ашёвий далиллар билан қўлга олинди.

ЎзА