Магистратура йўналишида имтиҳонлар 8 сентябрдан бошланди
У учун ҳеч қандай натижа қайд этилмайди. Жараён онлайн кузатиб борилмоқда.
АОКАда Олий ва ўрта махсус таълим вазирлиги бош бошқарма бошлиғи Абдували Холиқов магистратурага қабул, имтиҳон жараёнлари хусусида маълумот берди.
Мутахассиснинг таъкидлашича, бугун, 8 сентябрдан бошлаб магистратура учун 13 ҳудуддаги 19 бинода имтиҳонлар бошланди. Магистратурага ҳужжат топширган талабгорлар белгиланган қоидани бузса тестдан четлаштирилади. У учун ҳеч қандай натижа қайд этилмайди. Жараён онлайн кузатиб борилмоқда.
Бир хил йўналиш учун ҳужжат топширган абитуриентларнинг саволлари ўхшаш бўлмайди. Саволлар базаси шакллантирилган. Унда саволлар кетма-кетлиги таъминланади. Бунда инсон фактори роль ўйнамайди. Саволларнинг тарқаб кетмаслиги учун бу саволлар турли олий таълим муассасалари масъуллари томонидан тайёрланган.
Магистратурага ҳужжат топширганлар имтиҳонга ўзи билан фақат шахсини тасдиқловчи ҳужжат ва рухсатнома олиб бориши керак.