Shu kunlarda Avstriya poytaxti Vena shahrida Atom energetikasi bo‘yicha xalqaro agentligi (MAGATE) Bosh konferensiyasining 68-sessiyasi bo‘lib o‘tmoqda.

Tadbir doirasida O‘zbekiston Sog‘liqni saqlash vaziri vazifasini bajaruvchi Asilbek Xudoyorov va MAGATE bosh direktori Rafael Grossi o‘rtasida uchrashuv bo‘lib o‘tdi. Bu haqda SSV matbuot xizmati xabar berdi. 

Samimiy va do‘stona ruhda kechgan muloqotda tomonlar so‘nggi yillarda o‘zaro hamkorlik jadal sur’atlarda rivojlanayotganini mamnuniyat bilan qayd etdi.

Darhaqiqat, bugungi kunda mamlakatimiz agentlik bilan yadroviy tibbiyot, shu jumladan tibbiy nurlanishda radiologik himoya me’yorlarini takomillashtirish, nur terapiyasi uskunalarini modernizatsiya qilish, diagnostik radiologiya sifatini oshirish kabi qator sohalarda hamkorlik qilib kelmoqda.

Uchrashuvda yana bir muhim yo‘nalish – Toshkent shahrida yangidan barpo etilgan Respublika ixtisoslashtirilgan onkologiya va radiologiya ilmiy-amaliy tibbiyot markazi uchun mutaxassislarni tayyorlash va ularning malakasini oshirish bo‘yicha kelishuv imzolandi.

— Ushbu loyiha onkologik kasalliklarni diagnostika qilish va davolashning zamonaviy usullarini joriy etish, pirovardida O‘zbekistonda onkologiya xizmatining sifati va samaradorligini oshirishga xizmat qiladi. Biz ikki tomonlama hamkorlikni yanada kengaytirishga tayyormiz, — dedi R.Grossi.

Ta’kidlash joiz, davlatimiz rahbari shu yilning avgust oyida markazda yaratilgan qulaylik va imkoniyatlar bilan tanishish chog‘ida xodimlarni o‘qitish, muassasada samarali boshqaruvni yo‘lga qo‘yish topshirig‘ini bergan edi. Mazkur hujjatning imzolanishi ana shu vazifalar ijrosiga qaratilgani bilan ahamiyatli bo‘ldi.
Uchrashuv yakunida A.Xudoyorov MAGATE bosh direktorini yurtimizda yadroviy tibbiyot sohasida erishilgan yutuqlar bilan yaqindan tanishish uchun O‘zbekistonga taklif qildi.

O‘zA