АҚШ армияси Венесуэла Президенти Мадурони қўлга олиш амалиёти давомида “Anthropic” компаниясининг “Claude” сунъий интеллект моделидан фойдаланган, деб хабар тарқатди “Axios” янгиликлар портали.

СИ қурилмасининг бу жараёндаги аниқ вазифаси номаълум бўлса-да, юқори мансабдор манбалар айтишича, модел нафақат тайёргарлик пайти, балки рейд чоғида ҳам қўлланган. Бу ҳолат Пентагон доирасида хавотирни кучайтирмоқда. Мудофаа вазирлиги ҳозир компания билан ҳамкорлик масаласини қайта кўриб чиқмоқда.

АҚШ расмийларидан бири “Ҳарбий хизматчиларимизнинг жанг майдонидаги амалий муваффақиятига путур етказадиган компания билан муносабатни ўйлаб кўришимиз керак”, дея таъкидлаган.

Айни вазият бир томондан ҳарбийлар билан ишлашни истаган, иккинчи томондан эса ўз технологиясидан фойдаланишга нисбатан қатъий чекловга амал қиладиган йирик АI лабораториялари ўртасида тортишув келтириб чиқармоқда. Хусусан, ўзини СИ хавфсизлиги соҳасида етакчи сифатида кўрсатаётган “Anthropic” Пентагон билан ўз технологияси оммавий кузатув ёки автоном қуроллар учун ишлатилмаслигини таъминлаш учун музокара олиб бормоқда. Қолаверса, Пентагон Хитойдан олдинда юришга интилиб, армиянинг турли жабҳаларига СИни интеграция қилиш устида фаол иш олиб боряпти.

“Anthropic” Пентагон билан “Palantir” орқали ҳамкорлик қилади. “Claude” Венесуэладаги амалиётда ишлатилишини шу билан изоҳлаш мумкин. Фақат рейд пайти бошқа моделлардан ҳам фойдаланилганми ёки йўқми, номаълумлигича қолмоқда.

“Axios” сўровига жавобан “Anthropic” вакили шундай деган:

– “Claude” муайян амалиётда ишлатилганми ёки йўқми, биз изоҳ бера олмаймиз. Шуниси аниқки, қурилмадан фойдаланиш билан боғлиқ барча ҳолатлар тегишли шартларга мос келади.

С.Раҳимов, ЎзА