Венесуэла президенти Николас Мадуро Аргентинада ушлаб қолинган Boeing 747-300M транспорт самолётини қайтариб беришни талаб қилди.

"Лондонда олтинларимизни ўғирлади, АҚШ ҳудудида Citgo  нефтни қайта ишлаш компаниямизни ўғирлашди, энди улар самолётимизни ўғирламоқчи. Биз Венесуэланинг самолётини қайтариб беришини талаб қиламиз", – деб баёнот берди давлат раҳбари VTV телеканали эфирида чиқиш қилиб.

Куни кеча АҚШ Адлия вазирлиги Аргентинадан Boeing 747-300M  транспорт самолётини ҳибсга олишни сўраган эди. Америкаликлар олган маълумотларга кўра, самолёт Эрон авиакомпанияси томонидан венесуэллалик ҳамкасбларига берилган бўлган. Бунга эса Американинг экспорт назорати тартибларини бузиш, деб қаралмоқда. 

Хабарда келтирилишича, Эроннинг  Mahan Air компаниясига тегишли самолёт Венесуэланинг Emtrasur компанияси назоратига ўтган, яъни АҚШ ҳукумати рухсатисиз ҳаво кемасининг реэкспорт қилинишига йўл қўйилган.

Аргентина ҳукумати ҳаво кемаси билан қўшиб, самолёт экипажини, жумладан, беш нафар эронликни ҳам ҳибсга олган. Экипаж командири Эрон Ислом инқилоби ҳимоячилари корпусининг собиқ зобити бўлиб чиққан. Ушду ҳарбийлаштирилган тузилма АҚШнинг террорчилар рўйхатига киритилган, деб маълум қилди АҚШ Адлия вазирлиги.