Dastlab Madridda oʻtgan oʻyin haqida toʻxtalib oʻtsak. “Santyago Bernabeu” stadionida kechgan bahsda mezbon “Real” futbolchilaridan “Ayaks” klubiga yutqazmaslik talab etilardi. Yoki “qirollik klubi”ni minimal, yaʼni 0-1 hisobidagi magʻlubiyat ham qoniqtirardi.

Ammo, soʻnggi vaqtlarda Madrid osmoni uzra suzib yurgan qora bulutlar kecha dahshatli toʻfonga aylandi, desak mubolagʻa boʻlmaydi. Bejiz “qirollik klubi” ashaddiy va azaliy raqibi “Barselona”ga soʻnggi ikki imkoniyatni boy bermagani yana bir karra tasdigʻini topdi. Demak, “Real”ning yulduzli tarkibida muammolar yetarlicha ekan. Buni seshanba oqshomida “Ayaks”ning yosh futbolchilari ham koʻrsatib qoʻyishdi.

Garchi tanaffusga mehmonlar 0-2 hisobidagi ustunlik bilan yoʻl olgan boʻlsa-da “Real” ikkinchi boʻlimda vaziyatni oʻnglashiga jamoa muxlislari ishonishayotgan edi. Biroq, Santyago Solari shogirdlari 2-taymda ham vaziyatni oʻnglay olishmadi. Tarkibda birgina jamoa sardori Serxio Ramosning yoʻqligi “qirollik klubi”ga juda ham qimmatga tushdi. Ziyosh, Neres, Tadich va Shenelar tomonidan kiritilgan 4ta golga madridliklardan faqat Asensioning goli bilan javob qaytarishdi. Yakuniy natija – 1:4, “Ayaks” foydasiga. Shu tariqa Gollandiya klubi “Real” jamoasining Chempionlar ligasida qatorasiga toʻrtinchi bor gʻalaba qozonish orzusiga toʻrtta gol bilan nuqta qoʻydi. Ushbu gʻalaba evaziga amsterdamliklar oxirgi 16 yil ichida birinchi marta Yevropa klublari oʻrtasidagi eng nufuzli turnirda chorak finalga yoʻl oldi.

Kecha oʻtkazilgan ikkinchi oʻyinda Londonning “Tottenxem” klubi safarda ham “Borussiya” (Dortmund) ustidan gʻalaba qozondi. “Shporlar”ga gʻalaba keltirgan toʻp muallifi jamoaning yetakchi futbolchisi Xarri Keyn boʻldi.

Eslatib oʻtamiz, mazkur jamoalarning Londonda boʻlib oʻtgan dastlabki uchrashuvida ham Maurisio Pochettino shogirdlari yirik – 3:0 hisobida gʻalaba qozongan edi.