10 декабрь – Ўзбекистон Республикаси Давлат мадҳияси қабул қилинган

Шундай лаҳзалар бўладики, уни бўғзингга бир ютумгина нимадир тиқилганича жим кузатасан.

Қайсидир узоқ мамлакатдаги катта спорт аренасини кўз олдингизга келтиринг. Ватан байроғи баланд кўтарилмоқда. Минглаб томошабинлар орасида бир дақиқа жимлик чўкади. Юрагингизни титратиб, руҳингизни кўкларга кўтариб Ўзбекистон мадҳияси янграйди.

Серқуёш ҳур ўлкам, элга бахт, нажот, 
Сен ўзинг дўстларга йўлдош, меҳрибон! 
Яшнагай то абад илму фан, ижод, 
Шуҳратинг порласин токи бор жаҳон! …

Шу тантановор онларга гувоҳ бўлаётган ҳар бир юртдошнинг кўзи чақнайди. Ич-ичидан “менинг Ватаним ғолиб!”, деган шовқинсиз ҳайқириқ отилиб чиқади. Ана шу ҳис мадҳиямизнинг изоҳлаб бўлмас таърифи бўлади.

Мадҳия бу шунчаки куй ёки шеър эмас. У юртнинг қўшиққа айланган тарихи, авлодлар орзуси ва миллaтнинг бирдамлик рамзидир. Мадҳия янграса, бутун мамлакатнинг юраги бир маромда ураётгандек туюлади. Чунки у бизга кимлигимизни, қаердан келганимизни ва қаерга кетаётганимизни эслатади.

У она Ватанга муҳаббат уйғотади, халқни бир мақсадга бошлайди. Қийин пайтда куч, қувончли дамларда ғурур бағишлайдиган маънавий кучдир у.

Мадҳия давлатнинг энг олий маросимларида, байрамларда, халқаро тадбирларда, йилнинг муҳим сиёсий ва тарихи кунларида, таълим даргоҳларида, қисқаси, ҳар-бир юракда янграйди. У янграр экан, вазият қанчалик жиддий ёки тантанали бўлишидан қатъий назар, барчага бир туйғуни эслатади. Бу сенинг она юртинг, сен эса унинг бир парчасисан деган туйғу.

У янграганида кимдир мактаб чоғларини, кимдир армия сафини, яна кимдир байроқ остидаги ғолиблик дамларини эслайди.  

Бугун – муҳим кун. Ўзбекистон Республикаси Давлат мадҳияси қабул қилинганлигининг 33 йиллигини нишонлаяпмиз. Миллий руҳ қайта уйғонган, Мустақиллигимиз янада мустаҳкамланган кун муборак бўлсин.

Икром АВВАЛБОЕВ, ЎзА