Маҳалла остонасидан кириб борар экансиз, атроф-муҳитнинг ободлиги, озода-саришталигидан, ўзбекона файз уфуриб турганидан дилингиз яйрайди.

Янги таъмирдан чиққан маҳалла биносида ходимлар ва аҳоли учун барча шароит яратилган. Спорт зали, оталар чойхонаси, тадбиркорлар учун учрашув хоналари... Маҳалла кутубхонаси ҳам кўринишга эга бўлиб, эндиликда янги китоблар билан бойиди.

Яқинда маҳалла кутубхонасига Ўзбекистон Ёзувчилар уюшмаси томонидан турли номдаги 1000 дона китоб тақдим этилди.

– Бугунги кунга қадар кутубхонамизда 600 га яқин адабиёт бор эди. Ўзбекистон Ёзувчилар уюшмасига қилган мурожаатимиз жуда қисқа фурсатда ижобий ечим топганидан беҳад хурсанд бўлдик, – дейди “Ибрат” МФЙ раиси Алишер Тўхтаалиев. – Эндиликда кутубхонамизда адабиётларнинг сони ҳам, тури ҳам ортгани биз учун катта бойлик, деб ўйлайман. Бунинг учун уюшма мутасаддиларига ташаккур, дейман.

Ёзувчилар уюшмаси томонидан беғараз тақдим этилган бадиий, тарихий китоблар, аҳолининг хурсандчилигига, миннатдорлигига сабаб бўлди. Суҳбат чоғида ота-оналар янги нашрларни ўқиб чиқишларини таъкидлашди. Ёшлар ўртасида адабиётлар шу куннинг ўзидаёқ талаш бўлгани, уларни китоб жавонларига жойлаштиришда хайрихоҳ бўлишгани эса қувонарлидир.

Таъмирдан сўнг яна ўз фаолиятини бошлаган маҳалла кутубхонасига кирарканмиз, бу ерда аҳоли учун яратилган қулайликлар, ёш оналарнинг мутолаа билан бандлигини кўриб хурсанд бўлдик.