Өзбекстан әскерилері халықаралық «Cambrian Patrol» байқауында екінші орынды жеңіп алды.

Қорғаныс министрлігінің хабарлауынша, 2022 жылдың 4-12 қазан аралығында Ұлыбританияның Брекон қаласында өткен барлау және арнайы бөлімшелердің «Cambrian Patrol» халықаралық жарысына әлемнің 24 елінен 144 команда қатысты. 

90 шақырымды құрайтын жарыс бағытында әртүрлі деңгейдегі күрделі жағдайлардан тұратын, әр 8-10 км сайын бірнеше жауынгерлік тапсырмалар орындалды.

Сондай-ақ жаппай қырып-жою қаруын қолдану арқылы 3 шақырым шалғайдағы залалды аймақтан өту, орналасқан жерді барлау және тау өзенінен өту, жараланғандарға алғашқы медициналық көмек көрсету, зардап шеккендерді әртүрлі тәсілдермен эвакуациялау, жеке және топ болып мина бөгетінен өту, жау объектісіне шабуыл жасау, кепілге алынғандарды босату және әскери тұтқындардан жауап алу шартында қызметкерлер сынақтардан өтті.

«Сонымен қатар, командаларға 8 күтпеген «тест тосын сый» тапсырмасы берілді. Оған сәйкес шет мемлекеттердің қару-жарағы мен әскери техникасының түрлерін анықтау, имитациялық және байланыс құралдарының көмегімен артиллериялық атыстарды басқару, әскери топография нормаларын орындау, Женева конвенциясына сәйкес сынақтан өту, барлау бойынша есептерді дайындау және құрастыру, коммуникациялық дайындық стандарттарын орындау, атқарылған іс-шаралар және алдағы тапсырмаларды орындауға дайындық туралы хабарлау процестері де қарқынды болды», делінген хабарламада.

Жарыс қорытындысы бойынша бірінші орынды ұйымдастырушы ел – Ұлыбритания құрамасы, екінші орынды Өзбекстан Қорғаныс министрлігінің командасы, үшінші орынды Пәкістан құрамасы иеленген.