Дунёда энг кўп ташриф буюриладиган Лувр музейининг юзлаб ходимлари молиялаштиришдан қаттиқ норозилигини билдиришмоқда. Бу норозиликка музей ходимларининг қоровулларидан тортиб барчаси қўшилган, деб хабар бермоқда Евроньюс.

Сўнгги пайтларда музей билан боғлиқ бир неча нохуш вазиятлар юз берди. Эсингизда бўлса Луврга қилинган ўғирлик анча шов-шувга сабаб бўлган эди. Кейинчалик музейдаги кутубхонани сув босди. Бу ҳам етмагандай машҳур музейнинг том қисми қулаб тушиш арафасида экани айтилмоқда.  

Рождество байрами арафасида, Парижга сайёҳлар оқими авж олган пайтда дунёдаги энг машҳур музей ҳисобланган Луврнинг камида бир суткага ёпилиши, музей ходимларининг сабр косаси тўлганини билдиради. Негаки, душанба куни тахминан 400 нафар ходим касаба уюшмалари чақириғига бир овоздан қўшилиб, меҳнат шароитларининг ёмонлашуви ва қатор фавқулодда ҳодисаларга қарши иш ташлашга чиқди.

Касаба уюшмаси ходими Валери Боднинг айтишича ходимлар норозиликни қўллаб-қувватлаган, чунки уларнинг меҳнат шароитлари жуда ёмон. Унинг сўзларига кўра, сўнгги йилларда ходимлар сони қисқартирилгани, маош камлиги ҳам норозиликка сабаб бўлмоқда. «Луврда жуда яхши ишласангиз ҳам, барибир вазирликдаги ходимлардан кам маош оласиз», - дейди у.

Музейдаги инқироз 19 октябрь куни содир бўлган ўғриликдан кейин янада кучайди. Ўша куни кундузи Аполлон галереясидан Франция қироллик хазинасига тегишли саккизта буюм ўғирлаб кетилди. Ходимларнинг таъкидлашича, кадрлар етишмаслиги, техник носозликлар ва биноларнинг умумий эскириши сабабли, улар ҳар куни ташриф буюрувчиларнинг баъзи коллекцияларга киришини чеклашга мажбур бўлмоқда.

Касаба уюшмалари Лувр раҳбариятидан хавфсизликни таъминлаш ва меҳмонларни қабул қилиш учун 200 та қўшимча штат бирлигини жорий этишни талаб қилмоқда. Улар вақтинчалик эмас, доимий меҳнат шартномаларига устуворлик беришни сўрашмоқда.

Аввалроқ Франция Ҳисоб палатаси аудиторлари ҳам текширув ўтказиб, Лувр биносининг аста-секинлик билан мустаҳкамлик даражаси йўқолиб бораётганини таъкидлашган эди. Улар «Лувр Абу-Даби» бренди лицензиясидан тушадиган даромадларни янги лойиҳаларга эмас, асосий музейни тиклашга йўналтиришни тавсия қилган.

Ўтган ҳафта Лувр вакилларини Франция маданият вазири Рашида Дати қабул қилди. У 2026 йил бюджети лойиҳасида кўзда тутилган давлат молиялашувини 5,7 миллион еврога қисқартириш режаси бекор қилинишига ваъда берди. Бу музейга ажратиладиган субсидияни аввалги йиллар даражасида сақлаб қолиш имконини беради, холос. Аммо ходимларнинг фикрича, бу чора Париж рамзи бўлган музейдаги мавжуд муаммоларни ҳал этиш учун етарли эмас.

<iframe width="650" height="420" src="https://www.youtube.com/embed/7JdGMDBc7F0" title="Luvr muzeyi xodimlari norozilik uyushtirishdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Улуғбек Тўхтаев, ЎзА