ЛУҚМА: “Afrosiyob” йўлда, маълумотнома эса 224 минг сўм...
Мамлакатимизда карантин бошланганидан буён Қаршига қайтиб, масофадан туриб ишлаётгандим.
Мамлакатимизда карантин бошланганидан буён Қаршига қайтиб, масофадан туриб ишлаётгандим. 17 май куни пойтахтга жўнаш учун Қарши шаҳридан Тошкентга қатнайдиган таксилар майдончасига бордим. Майдон бўм-бўш эди.
Йўл устида майда-чуйда сотиб ўтирган йигитчадан сўрадим.
– Тошкентга таксилар қатнаяптими?
– Йўлнинг нариги тарафида турганлардан сўранг. Яшириниб, қочиб-пусиб бориб-келишяпти.
Ҳақиқатан, кўздан панароқда икки-учта шахсий машина турарди.
– 300 минг, – деди йигитлардан бири. Шаҳарнинг исталган жойига обориб қўямиз.
Одатда “тинчлик” замонларида 60-70, кўпи билан 100 минг сўм атрофида бўладиган йўлкира 300 мингга чиққанди!
Республика махсус комиссиясининг 18 майдан Тошкентдан вилоятларга қатновчи “Afrosiyob” тез юрар поездларига рухсат бергани ёдимга тушиб, темир йўл вокзалига жўнадим.
Доимо одам гавжум бўладиган, кўпинча чипталар топилмайдиган Қарши темир йўл вокзали ҳувиллаб ётар, ҳайҳотдай залда биргина кассир қиз ўтирарди.
– Эртадан “Afrosiyob” поезди қатнови йўлга қўйилади, деб эшитувдим? – қизга мурожаат қилдим.
– Ҳа билетлар бор! – Қулоғим ўрганмаган сўзни эшитиб, хурсанд бўлиб кетдим.
– Нархлари қанақа?
– 146 мингдан 300 минг сўмгача. Фақат коронавирусга чалинмаганлиги тўғрисидаги маълумотнома асосида поездга чиқарилади.
Кассир қиздан бу маълумотномани қаердан олиш мумкинлиги ҳақида батафсил сўраб-суриштиргач, Қашқадарё вилояти санитария-эпидемиологик осойишталик марказига бордик.
Якшанба куни бўлса-да, бу ерда одам гавжум эди. Қабул бўлимида ўтирган қизларга мақсадимизни айтиб улгурмай, коронавирусга таҳлил топшириш бугундан пуллик бўлганини билдирди.
– Бир кишига неча пулдан экан? – дея сўрадим.
– 224 минг сўмдан, – Мен ҳали бирон нарса демасимданоқ улар қўшимча қилди. – Иккинчи қаватга чиқиб, Сувоновга учрашсангиз тушунтиради.
– У киши ким?
– Бош шифокор ўринбосари.
Сувонов бош шифокорнинг хонасида экан. Хона одамлар билан гавжум эди. Очиқ турган эшикдан эшитдимки, ҳамма шу масалада келган. Ўзини Жуманазар Сувонов, деб таништирган одам “Биз нима қилайлик, бугундан вазирликнинг буйруғи чиқди”, дея изоҳ берди. “Биз “тепа” нима деса, шуни бажарамиз-да”.
Соғлиқни сақлаш вазирлигининг бу буйруғини тушуниш мумкин. Давлатимиз коронавирус касаллигига чалинган беморларни даволаш, карантинда сақланаётганларни текшириш, парваришлаш учун катта маблағ сарфламоқда ва бу хориждагидан фарқли равишда тўлиқ давлат ҳисобидан амалга оширилмоқда. Коронавирус таҳлили учун белгиланган сумма ҳам ўзини бемор сезаётган, касалликка гумон қилинаётган киши учун унчалик қиммат эмас.
Аммо йўловчи – ўзини соғлом ҳис қилаётган, коронавирус таҳлилига эҳтиёж сезмаётган, зарурат юзасидан йўлга чиқишга мажбур бўлаётган киши учун бу нарх қимматдир. Ҳисоблаб кўринг: энг арзон чипта нархи 146 минг сўм бўлса, маълумотнома учун 224 минг тўланса, икковининг қўшилгани 370 минг, оилавий кетаётганлар (икки-уч киши) учун эса йўлкира 1 миллион сўмдан ошади!
Албатта, санитария-эпидемиологик осойишталикни таъминлаш бугуннинг жиддий масаласи. Бироқ у йўловчиларнинг чўнтаги ҳисобидан бўлмаслиги керак. Аҳолимизнинг икки ойдан буён карантин шароитида яшаётганини назарда тутсак, бу тўғри ечим эмас.
Президентимиз ҳар бир чиқишида раҳбарларга қарата оддий одамларни ўйланглар, биринчи навбатда, аҳоли манфаатларини ҳисобга олинглар, деб турган бир пайтда Соғлиқни сақлаш вазирлиги, “Ўзбекистон темир йўллари” АЖ каби нуфузли идораларнинг “валломат”лари бундай чуқур ўйланмаган қарорлар қабул қилиб, йўловчиларни ғазаблантираётган, кайфиятини бузаётганига нима дейсиз?!