Буюк Британия Бош вазири Кир Стармер Пекинга расмий ташрифи чоғида Хитой Халқ Республикаси Раиси Си Цзиньпин билан учрашиб, “етук ва мувозанатли муносабатлар” тарафдори эканини билдирди. Сўнгги саккиз йилда илк бор ХХРга келган Бирлашган Қироллик етакчиси сифатида у ўз ташрифини анча совуқлашиб кетган Лондон – Пекин алоқаларини қайта тиклашга уриниш, дея баҳолади.

Халқ саройида бўлиб ўтган 80 дақиқалик мулоқот чоғи Стармер иқтисодий юксалишни тезлаштириш ва хавфсизликни мустаҳкамлаш учун Хитой билан мулоқот жуда муҳимлигини қайд этди. Унинг айтишича, ҳамкорликнинг янги имкониятларини излаш билан бирга, келишмовчиликлар бўйича очиқ ва мазмунли муносабат ўрнатиш ҳам зарур. Си Цзиньпин эса икки томон ҳаракатлари ўтмишда турли тўсиқларга дуч келганини тан олиб, энди узоқ муддатли стратегик шерикликка тайёр эканини таъкидлади.

Стармернинг ХХРга юзланиши ички ва ташқи  сиёсий омиллар билан боғлиқ. Лейбористлар ҳукумати ваъда қилинган иқтисодий ўсишни таъминлашга қийналаётган бир пайт, дунёнинг иккинчи йирик иқтисодиёти билан савдо ва инвестицияни кучайтириш муҳим имконият сифатида кўрилмоқда. Шу билан бирга АҚШ Президентининг кескин ва олдиндан айтиб бўлмас савдо сиёсати Европадаги иттифоқчилар, жумладан Британияни муқобил дипломатик йўлларни излашга ундамоқда.

Шу маънода айни ташриф амалий натижага қаратилган. Стармер билан Пекинга 50 дан ортиқ британиялик бизнес етакчилари борган. Томонлар ноқонуний миграция билан шуғулланувчи жиноий гуруҳларга қарши ҳамкорликни кучайтириш бўйича келишув эълон қилиши кутилмоқда. Хусусан, Европага одам ташишда фойдаланилаётган кичик қайиқлар учун Хитойда ишлаб чиқарилган двигателлар оқимини чеклаш ва контрабанда йўллари бўйлаб разведка алмашинувини кучайтириш режалаштирилган.

Бу гал инсон ҳуқуқи масаласи ҳам четлаб ўтилмайди. Қисқаси, мазкур учрашув Қироллик Хитойга нисбатан янги, эҳтиёткор, аммо прагматик сиёсат юрита бошлаганидан дарак бераётгандек.

Мусулмон Зиё, ЎзА