Давлатимиз раҳбарининг 2025 йил 30 январдаги “Ўзбекистон – 2030” стратегиясини “Атроф-муҳитни асраш ва “яшил иқтисодиёт” йилида амалга оширишга оид давлат дастури тўғрисида”ги фармони ва 2022 йил 30 апрелдаги “Ички туризм хизматларини диверсификация қилишга оид қўшимча чора-тадбирлар тўғрисида” қарори асосида жорий йилнинг 11-16 август кунлари Қашқадарё вилояти, Шаҳрисабз туманидаги “Лочин” оромгоҳида “Ёшлар келажак бунёдкорлари!” IV экология ва туризм халқаро қурултойи бўлиб ўтмоқда.

Қурултой ёшларнинг экология ва ижтимоий-иқтисодий соҳалардаги фаоллигини ошириш, уларни туризм соҳасига кенг жалб этиш, ёшларнинг экология ва туризм соҳасидаги истиқболли ғоялари ҳамда лойиҳаларини амалга ошириш мақсадида ташкил этилмоқда.

Қурултой доирасида Экология, атроф-муҳитни муҳофаза қилиш вазирлиги, Туризм қўмитаси ҳамда Қашқадарё вилоят ҳокимлиги ҳамкорлигида пресс-тур ҳам ташкил этилади ва унда 30 дан ортиқ журналист ва блогерлар, шу жумладан, оммавий ахборот воситалари вакиллари иштирок этиши режалаштирилган.

Тадбирларда мамлакатимизда фаолият олиб бораётган чет эл дипломатик корпуси вакиллари, қўшни вилоятлар ва шаҳарлар делегациялари ҳам қатнашиши кўзда тутилган.

Шу билан бирга, Тожикистон, Қирғизистон, Қозоғистон, Беларусь Республикалари, Россия Федерацияси ҳамда Ўзбекистонда таҳсил олаётган хорижий талабалар ҳам таклиф этилган.

Халқаро қурултойда юртимизнинг ҳар бир ҳудудидан 54 нафардан иқтидорли, ижтимоий ҳимояга муҳтож, шу жумладан ногиронлиги бўлган ҳамда “Ёшлар дафтари”га киритилган ўқувчи, талаба ёшлар ҳамда “Ёш экологлар” ҳаракати ва Ёш туризм элчилари Кенгашлари аъзолари ҳам жалб қилинган.

[gallery-24731]

Олти кун давомида меҳмонларни ажойиб ва бетакрор тадбирлар кутмоқда.

Қурултой доирасида турли танловлар, плогинг мусобақалари, экологик ва туристик лойиҳалар, спорт мусобақалари, ёшлар учун бизнесни ташкил қилиш, маданий-кўнгилочар тадбирлар ва таниқли инсонлар билан учрашувлар ташкил этилади.

Якунда фаол иштирок этган гуруҳлар ва ҳудудлар жамоалари вакиллари диплом ҳамда эсдалик совғалари билан тақдирланиши кўзда тутилган. Шу билан бирга, қурултой иштирокчиларининг ҳар бирига Экология, атроф-муҳитни муҳофаза қилиш вазирлигининг махсус сертификати топширилади.

Қурултойда ёшларнинг ташаббусларига мувофиқ Марказий Осиё ёшларининг туризм ва экология ассоциациясини (Central Asian tourism and ecology youth association) ташкил этиш бўйича низом лойиҳаси билан танишув ҳамда ассоциация раиси сайлови амалга оширилади.

“Ёшлар келажак бунёдкорлари” IV экология ва туризм халқаро қурултойига мингдан ортиқ иштирокчилар келиши кутилмоқда.

<iframe width="650" height="420" src="https://www.youtube.com/embed/80tYk3zHnBw" title="“Lochin” oromgohi yana bir xalqaro qurultoyga mezbonlik qilmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ўлмас Баротов, Жамшид Норқобилов (сурат), ЎзА мухбирлари