Ливия астанасы Триполиде 15 желтоқсан күні кешке қарулы адамдар президент сарайына басып кіріп, үкімет пен қорғаныс министрлігі ғимараттарын қоршауға алды.

Sky News-тің хабарлауынша, елдегі Президенттік кеңестің төрағасы мен мүшелері үйлеріне шабуыл жасауға дайындалып жатқаны туралы ақпарат алғаннан кейін эвакуацияланған.

Мемлекеттік мекемелерді басып алуға қатысқан сарбаздар әл-Самуд бригадасы батальонының құрамында екені айтылады. Олар бұған дейін «Ливияда президенттік сайлау болмайтынын және Триполидегі барлық мемлекеттік мекемелердің жабылатынын» айтқан еді.

БАҚ-та тараған мәліметтерге қарағанда, қарулы адамдар маңызды инфрақұрылым нысандарын басып алған. Сондай-ақ, елдің батысындағы ірі қалалардағы бірнеше әскери бөлімдер жауынгерлік әзірлікке қойылған.