Ливияның Тобрук қаласы маңында 74 мигрант мінген кеме суға батып кетті.

Бұл туралы араб еліндегі БҰҰ Қашқындар ісі жөніндегі Жоғарғы комиссарлығының өкілдігі хабарлады.

— Басым бөлігі судандықтар болған қайық жағалауға таяу маңда аударылып кеткен, — делінген мәлімдемеде.

Агенттік дерегінше, оқиға 13 қыркүйек, сенбі күні орын алған. Қайықтағы 13 адам құтқарылғанымен, ондаған адамның тағдыры әзірге беймәлім.

Сахараның оңтүстігіндегі аймақтардан күн сайын жүздеген мигрант Тунис пен Ливия арқылы Еуропаға қайықпен өтуге талпынады. Өкінішке қарай, олардың ондағаны осындай қасіретті сапардың құрбанына айналады. Әсіресе, өткен жылы мұндай қайғылы оқиғалар айтарлықтай жиілеген еді.