Tayland Kambodja bilan chegaradagi ikkita harbiy obyektga zarba yo‘llagan. Xabarlarga ko‘ra, Tailand Kambodja bilan chegara punktlarini yopishga qaror qilgan.
To‘qnashuvlar taylandlik askar “bahsli hudud”da mina portlashi oqibatida “bir oyog‘idan ayrilgani” ortidan kelib chiqdi. Ayni paytda Tayland Kambodjadagi elchisini chaqirib olgan.
Ushbu to‘qnashuv bo‘yicha ikki davlat rasmiy yangilanishlarni ma’lum qildi.
Tayland:
Tayland Milliy Xavfsizlik Kengashi (MXK) vakilining so‘zlariga ko‘ra, bugun mahalliy vaqt bilan soat 07:30 dan keyin Kambodja harbiylari chegara yaqinida Tayland qo‘shinlarini kuzatish uchun uchuvchisiz samolyotlarni joylashtirdi.
Oradan ko‘p o‘tmay, chegara yaqinida RPG olib ketayotgan Kambodja harbiylari to‘planishdi. Tayland tomonidagi askarlar chegara ortidagi Kambodja zobitlari bilan baland ovozda muzokara o‘tkazishga harakat qilishdi, ammo bu muvaffaqiyatsiz bo‘ldi. Kambodja askarlari soat 08:20 atrofida o‘q otib, Tayland tomonini o‘ch olishga majbur qildi.
Tayland Kambodjani og‘ir qurollarni, jumladan, “BM-21” raketa otish moslamalari va artilleriyasini joylashtirib, chegaraning Tayland tomonidagi uylar va jamoat obyektlariga zarar yetkazganlikda aybladi.
Tayland Sog‘liqni saqlash vazirligi chegaradagi qurolli to‘qnashuvda 12 kishi halok bo‘lganini ma’lum qildi. Ular orasida bir nafar harbiy va 11 nafar tinch aholi vakillari bor.
Kambodja:
Tayland askarlari bugun ertalab soat 06:30 atrofida to‘qnashuvni boshladilar, ular chegara yaqinidagi Xmer hindu ibodatxonasiga borib, uning poydevoriga tikanli sim o‘rnatib, oldingi kelishuvni buzdi.
Kambodja Milliy Mudofaa vazirligi vakilining so‘zlariga ko‘ra, Tayland askarlari soat 07:00 dan keyin dronni uchirgan va 08:30 atrofida “havoga” o‘q uzgan.
Vazirlik matbuot kotibi Mali Socheataning so‘zlariga ko‘ra, soat 08:46 da Tayland askarlari “oldindan” Kambodja qo‘shinlariga qarata o‘t ochgan va bu holat kambodjalik harbiylarda o‘zini himoya qilish huquqidan foydalanishdan boshqa chora qoldirmagan.
Socheata yana Taylandni haddan tashqari ko‘p qo‘shinlar joylashtirganlikda, og‘ir qurollardan foydalanganlikda va Kambodja hududiga havo hujumlari uyushtirganlikda ayblamoqda.
O‘tkir XON, O‘zA