Исроил Ливан жануби ва шарқига навбатдаги ҳужумни бошларкан, “Ҳизбуллоҳ” билан курашнинг янги босқичида “ҳисоб-китоб жанги”га киришаётганини билдирди.

Якшанба куни “Ҳизбуллоҳ” Исроилнинг шимолий ва марказий қисмига ракета зарбалари йўллаб, мамлакатнинг учинчи йирик шаҳри – Хайфа яқинидаги ҳаво базаси ва ҳарбий мажмуани нишонга олди. Бу ҳақда “Al-Jazeera” маълум қилган.
– Исроил “Ҳизбуллоҳ” обектларини нишонга олмоқда, – дея хабар берган мухбир Байрутдан. – Бинобарин, гуруҳ фалаж бўлмагани аниқ. Демак, можаро кенгайди ва янада кучайиши мумкин.

Ливан Миллий ахборот агентлиги шундай ёзган:

– Исроил ҳарбий самолётлари жанубий Набатия губернаторлигига ярим соат ичида 80 дан ортиқ ҳужум амалга оширган. Жами ўн бир ҳудуд нишонга олинган. Бир киши ҳалок бўлиб, кўпчилик яраланган.

Яҳудий давлати аскарлари ливанликларни “Ҳизбуллоҳ” манзилларидан узоқроқ кетишга чақириб, қўшимча зарба берилишини айтган.

Байден сайлов пойгасидан чиққандан сўнг илк бор сўзга чиқди

Жо Байден президентлик пойгасидан чиққандан буён биринчи марта нутқ сўзлади. Ўзи эришган ютуқлар, камтарлиги ҳақида гапирган Байденнинг фикрича, Америка келажаги демократлар қўлида.

Давлат раҳбари овоз беришга бир неча ой қолганда қайта сайланишдан воз кечганига атрофлича изоҳ бермаган.

– Сўнгги ҳафталарда партиямизни бирлаштиришим кераклиги аён бўлди, – деди у. – Маъшалани янги авлодга топшириш вақти келди. Демократиямизни сақлаб қолиш йўлида ҳеч нарса тўсиқ бўла олмайди. Ҳатто, шахсий амбиция ҳам.
Етакчининг маърузаси вице-президентга насбатан танқидларни рад этиш ва президентлик вазифасини бажаришда давом этиши мумкинлигини кўрсатиш учун яхшигина имконият эди.

Сўзи охирида номзод ҳақида гапираркан, Харрисни тажрибали, қаттиққўл, қобилиятли ва мамлакат учун керак етакчилигини қўшимча қилди.

Жо Байден ўтган ҳафта коронавирусга чалинган ва Делавердаги уйида даволаниб, яна Оқ уйга қайтгани маълум қилинган.

С.Поёнов,

ЎзА