Литвада фермерлар суюлтирилган газга акциз солиғи оширилиши, сут инқирози каби қатор муаммоларга қарши чиқмоқда. Шу муносабат билан пойтахт Вильнюсда қишлоқ хўжалиги соҳаси вакилларининг норозилик митинги бўлиб ўтади.

Мамлакат матбуоти хабар беришича, сешанба куни кечқурун Вильнюс маркази фермерлар ва ўрмончилар техника воситалари – тракторлар, юк машиналари билан тўлган. Ҳукумат биноси олдида чиқиш қилиш учун саҳна қурила бошланган.

Фермерлар ҳукумат эътиборини бир неча масалага – суюлтирилган газга акциз солиғи оширилиши, фермер хўжаликлари юк машиналари учун дизель ёқилғисига акциз солиғини бекор қилиш, кўп йиллик ўтлоқларни тиклаш, қўриқланадиган ҳудудларни ривожлантириш, сут етиштиришдаги инқироз ва бошқа муаммоларга қаратмоқчи.

Митинг ташкилотчиларидан бири – Литва қишлоқ хўжалиги кенгаши аъзоси Дайнюс Арлаускас айтишича, 1300 га яқин оғир техника пойтахтнинг асосий кўчалари ва шаҳарга кириш йўлларини тўсиб қўйган. Акция иштирокчилари барча техника воситаларини шаҳар марказига жойлаштириш ниятида.

– Гедиминас кўчаси ва Сейм рўпарасидаги майдон ҳам машина билан тўлган, бизнинг ҳисоб-китобга кўра, бу ерда 600 га яқин трактор бор, – дейди Арлаускас. – Яна шунча техника бошқа белгиланган нуқталарга жойлаштирилади, аниқ манзилини айта олмайман.

Икки қаторда саф тортган тракторларга фермерлар талаби ёзилган шиорлар, қишлоқ хўжалиги вазири Кястутис Навицкасни масхараловчи фотосуратлар осилган.

Рокишк вилоятидаги деҳқончилик фермаси эгаси Дайнюс Микалайчюнас намойишчи фермерлар сарф-харажатни ўйламасдан намойиш жойига келаётганини таъкидлади. Зеро, тракторда узоқдан келиш учун кўп ёнилғи зарур. Унинг айтишича, муаммолар жуда жиддий, шу боис фермерлар ниятидан қайтмоқчи эмас.

Чоршанба ва пайшанба кунлари ҳукумат биноси олдида фермерлар ва уларнинг тарафдорлари томонидан норозилик митинги ўтади. Акцияда, тахминан, икки мингдан беш минггача одам қатнашиши кутиляпти.

Навицкас ва экология вазири Симонас Гентвилас намойишчилар билан учрашишга ваъда берган.

Кенжа Бекжонов, ЎзА