Кофені сүйіп ішетін адамдар жақын арада таңғы сүйікті сусынының бағасының қымбаттауына тап болуы мүмкін, себебі халықаралық сауда нарықтарында кофе бағасы тарихтағы ең жоғары көрсеткішке жетті.

BBC-дің хабарлауынша, 10 желтоқсанда әлемде ең көп өндірілетін арабика сортының бағасы фунты (0,45 килограмм) үшін 3,44 доллардан асты. Бұл жағдай әлемдегі ең ірі екі кофе өндіруші — Бразилия мен Вьетнамның қолайсыз ауа райынан зардап шегуімен және сусынның күн санап танымал бола түсуімен байланысты болып отыр.

BBC-ге пікір білдірген сарапшылардың бірі кофе брендтері осы жылдың өзінде бағаны көтеру мүмкіндігін қарастырып жатқанын айтты.

Tuan Loc Commodities компаниясының бас директоры Вин Нгуеннің айтуынша, соңғы жылдары ірі кофе өндірушілер өз клиенттерін жоғалтпау және нарықтағы үлесін сақтап қалу үшін бағаны көтермей келген, бірақ енді жағдай өзгеріп барады. «JDE Peet, Nestle және басқа да осындай брендтер шикізат бағасының өсуінен қатты зардап шегіп отыр», — деді ол.

Кофе өнімділігінің төмендеуі бойынша бұған дейінгі рекорд 1977 жылы Бразилиядағы плантацияларға күтпеген жерден қар жауған кезде тіркелген.