Россия Президентининг матбуот котиби Дмитрий Песков айтишича, Кремль Украина билан “ҳарбий можарони ҳал этиш масаласида” АҚШ Президенти Дональд Трамп билан алоқаларни қайта тиклашга умид қилмоқда. Бу ҳақда Песков CNN телеканалига берган интервьюсида маълум қилди.

Унинг таъкидлашича, Москва Вашингтон билан муносабатни “Америка қай даражада тайёр бўлса, худди шундай тезлик билан” йўлга қўйишга тайёр. Эслатиб ўтамиз, бундан бир кун олдин Россия ташқи ишлар вазири Сергей Лавров ҳам айни мазмундаги баёнот билан чиққан эди.

– Биз чин дилдан умид қиламизки, Президент Трамп Украина муаммосини сиёсий ва дипломатик йўл билан ҳал этиш учун  кўмак беришга ҳали ҳам тайёр, – дея умид билдирган Песков.  

Шунингдек, “иккала мамлакат ўртасидаги муносабатни яхшилаш, савдо ва иқтисодий ҳамкорлик учун янги имкониятлар яратиш” зарурлигини таъкидлаб, “томонлар олдида жуда ёрқин истиқбол очилгани”ни қўшимча қилган. Песковнинг сўзларига кўра, ҳозирги айни вазият “вақт, пул ва бошқа йўқотишларга” олиб келмоқда, холос. 

Матбуот котибининг бу баёноти Сергей Лавровнинг мурожаатидан сўнг янгради. Эсласангиз, Лавров ҳам амалга ошмай қолган АҚШ ва Россия етакчилари ўртасидаги Будапешт учрашувини қайта ташкил этишга чақирган эди. Нима учун Кремлдан кетма-кет бундай чақириқлар янграб қолди? Бу ҳаракатлар замирида икки мақсад борлиги тахмин қилинмоқда. Биринчиси, санкция босимини юмшатиш ва Россияни “ёлғизланиб қолган давлат” мақомидан чиқариш. Иккинчиси, чекловлар сабаб Россия иқтисодиётидаги йўқотишларни камайтириш ва савдо алоқаларини қисман бўлсада тиклаш. Шу боис, Трампнинг сиёсий услуби ва Россияга нисбатан юмшоқ позицияси айни дам Кремль учун қулай имконият сифатида кўрилмоқда. Песков “Украина можаросини сиёсий ва дипломатик йўл билан ҳал этиш” ҳақида гапирса-да, Россия томони бугунги кунгача фронтдаги фаол ҳаракатини тўхтатмаган. Шу боис, Кремлнинг “тинчлик музокаралари” ташаббуси ишонарсиз бўлса-да, кўпчилик таҳлилчилар томонидан дипломатик имиж яратиш ҳаракати, яъни халқаро танқидларни юмшатишга уриниш сифатида баҳоланмоқда.

Кремлнинг Трамп орқали мулоқот йўлини излаши Россиянинг стратегик қамалдан чиқишга интилишига ўхшайди. Бинобарин, уруш тўхтамагунча ва Москва реал сиёсий ён босишга ўтмагунча, бу ташаббус халқаро майдонда жиддий қабул қилиниши эҳтимоли камдек. Песков ва Лавровнинг баёнотлари кўпроқ дипломатик йўл бўлиб, Ғарб жамоатчилигига “Россия музокараларга тайёр” деган тасаввурни етказиш кўзланган, холос.

<iframe width="650" height="420" src="https://www.youtube.com/embed/NPyRimS86js" title="Lavrovdan so‘ng Peskov ham Trampga murojaat qildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Улуғбек Тўхтаев, ЎзА