Наманган вилояти Мингбулоқ туманининг Баланд Гуртепа маҳалласида истиқомат қилувчи Муҳаммаджон Тошхонов 15 йилдан буён қизил лавлаги етиштириш билан шуғулланиб келмоқда. У яшаётган ҳудуд — Наманган вилояти, Мингбулоқ тумани — қишлоқ хўжалиги учун қулай шароитлари билан танилган.

Деҳқоннинг айтишича, қизил лавлаги етиштириш осон иш эмас. Бу экин буғдой ҳосили йиғиштириб олингач, бўшаган ерга экилади. Жараённинг ҳар бир босқичи — экиш, ўтоқ қилиш, ҳосилни териб олиш ва саралаш — асосан қўл меҳнатини талаб қилади. Шу боис қизил лавлаги етиштириш кўп сабр, эътибор ва тажрибани тақозо этади.

Йиллар давомида тўпланган билим ва амалий кўникмалар туфайли Муҳаммаджон Тошхонов бу соҳанинг чинакам устасига айланган. Унинг даласидан олинган ҳосил нафақат водий бўйлаб, балки қўшни Қирғизистон ва Қозоғистон бозорларига ҳам етказиб берилади. Бу эса маҳаллий деҳқон меҳнатининг қадри ва маҳсулот сифатининг юқорилигидан далолат беради.

Қизил лавлаги етиштириш орқали у нафақат ўз оиласи даромадини таъминлаяпти, балки ҳудудда қишлоқ хўжалиги маҳсулотлари экспортини кенгайтиришга ҳам муносиб ҳисса қўшмоқда. Бундай фидокорона меҳнат эгалари қишлоқ тараққиётининг таянчи саналади.

<iframe width="560" height="315" src="https://www.youtube.com/embed/Yxzg18rIKos?si=EWJ2lnFPisXoeWHu" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Тоҳир Турсунов, ЎзА