Эртадан куз фасли бошланади. Дунё эпидемиологлари ушбу фаслда коронавирус янада тез суръатларда тарқалиши мумкин деган хулосада. Хусусан, Жаҳон соғлиқни сақлаш ташкилоти Европа минтақавий бюроси раҳбарининг сўзларига кўра, бу даврда касалланишлар сони кескин ўсиши кутилмоқда.

  
Мамлакатимиз ССВ матбуот хизматининг таъкидлашича, у Европа минтақасида пандемия бошланганидан буён COVID-19ни юқтирган беморлар сони бир неча ҳафта ўтиб 250 миллион нафарга етишини айтган. 
  
– Тўғри, биз ўтган даврда коронавирусга қарши кураш борасида катта натижаларга эришдик. Аммо ҳали инфекция кенг тарқалишда давом этмоқда. Шифохоналарга ҳамон бу касалликка чалинган беморлар ётқизиляпти ва ҳануз жуда кўп ўлим ҳолатлари кузатилмоқда. Масалан, ўтган ҳафтанинг ўзида минтақамизда 3 минг нафарга яқин киши мазкур хасталик оқибатида ҳаётдан кўз юмди. Бу дунё бўйича 22-28 август кунлари коронавирусдан вафот этганларнинг учдан бир қисмини ташкил қилади, – деган Ханс Клюге. 
  
Жаҳондаги кўплаб мамлакатлар, ҳатто иқтисодий аҳволи мақтанарли бўлмаган давлатлар ҳам эмлаш жараёнини узлуксиз давом эттирмоқда. Аммо Европада ҳали вакцина олмаган миллионлаб кишилар бор. Энди ана шу одамларнинг эмланиши учун зарур чораларни топиш лозим. Айниқса, аҳолининг иммунитети заиф қатламлари, жумладан, кекса ёшли инсонлар, ёндош касалликлардан азият чекаётган беморлар биринчи навбатда бустер дозани қабул қилишлари керак. Шунингдек, ЖССТ вакили бу мавсумда грипп эпидемиясига қарши вакциналарни ҳам қўллашга алоҳида эҳтибор қаратиш зарурлигини қайд этди. 
  
Мамлакатимизда эса айни кунларда коронавирус билан боғлиқ эпидемиологик вазият барқарор. Кеча 30 август куни 17 нафар фуқарода касалланиш қайд этилган бўлиб, рўйхатга олинган беморларнинг: 1 нафари Қорақалпоғистон Республикасида; 3 нафари Тошкент вилоятида; 13 нафари Тошкент шаҳрида коронавирусга чалинган беморлар билан мулоқотда бўлганлиги сабабли намуна олинган фуқаролар орасида қайд этилган. 
  
Санитария-эпидемиологик осойишталик ва жамоат саломатлиги хизмати бош мутахассиси Рауф Қосимовнинг сўзларига кўра, янги ўқув йилида таълим муассасаларига ўқувчи ва талабалар пандемиядан олдинги даврдагидек кутиб олинади. Улардан тиббий ниқоб тақиш ёки ҳароратини ўлчаш, қўлларини антисептик билан зарарсизлантириш талаб қилинмайди. 
  
Аммо ҳар куни битта бўлса ҳам касалликка чалинаётган бемор борлиги, ҳушёрликни йўқотмасликка, гигиена талабларига риоя қилишга сабаб бўлади. 
  
Сўнгги ҳафталарда Европа бўйича энг кўп касалланиш ҳолатлари Германия ва Францияда рўйхатга олинмоқда.

  
М.Қосимова, ЎзА