Кувайт жанубидаги Мангоф шаҳрида турар-жой биносида чиққан ёнғин 41 кишининг ҳаётига зомин бўлди. Бу ҳақда мамлакат Бош вазири ўринбосари Шайх Фаҳод Юсуф Соуд Aс-Сабоҳ маълум қилган. У мулк эгаларини қурилиш қоидасини бузишда ва очкўзликда айблади.

Мамлакат Ички ишлар вазирлиги маълумотига кўра, яна 40 нафарга яқин инсон тиббий ёрдам кўрсатиш учун шифохонага етказилган. Ёнғин ўчирилгандан сўнг қутқарувчилар ва терговчилар қурбонларни қидиришда давом этди. Зарар кўрган бино эгаси эҳтиёт шарти билан ҳибсга олинган.

Полиция ёнган бино ишчилар учун ётоқ жойи сифатида фойдаланилгани, ёнғин пайти кўпчилик ичкарида бўлганини айтган. Ўнлаб инсонлар ис газидан заҳарланиб вафот этганига эътибор қаратиб, ҳар доим турар-жойда жуда кўп ишчи жойлаштирилиши хавфидан огоҳлантириб келганини таъкидлаган.